អ្នកស្រី ទេព វន្នី ទទួល​ពាន​រង្វាន់​មេ​ដឹកនាំ​ពិភពលោក

អត្ដបទព័ត៌មានវិទ្យុអាស៊ីសេរី

ពី​ស្ត្រី​មេ​ផ្ទះ​មក​ជា​សកម្មជន​តវ៉ា​ការ​បណ្ដេញ​ចេញ​ពី​លំនៅឋាន​កម្ពុជា រហូត​ដល់​បាន​ទទួល​ពាន​រង្វាន់​ស្ត្រី​ជា​មេ​ដឹកនាំ​ពិភពលោក នៅ​ចំពោះ​មុខ​អនុ​ប្រធានាធិបតី​សហរដ្ឋ​អាមេរិក អតីត​រដ្ឋមន្ត្រី​ក្រសួង​ការ​បរទេស​សហរដ្ឋ​អាមេរិក សមាជិក​ព្រឹទ្ធសភា រដ្ឋសភា​អាមេរិក និង​បណ្ដា​ភ្ញៀវ​កិត្តិយស​សំខាន់ៗ​រាប់​ពាន់​នាក់​ទៀត។

ដោយ តាំង សារ៉ាដា
ទេព វន្នី ៣០៥
អ្នកស្រី ទេព វន្នី (ពី​ស្ដាំ​ទី​ពីរ) ក្នុង​ពិធី​ប្រគល់​ពាន​រង្វាន់​ស្ត្រី​ភាព​ជា​មេ​ដឹកនាំ​ពិភពលោក របស់​អង្គការ​វ៉ាយថល វ៉យស៍ (Vital Voices) ក្នុង​រដ្ឋធានី​វ៉ាស៊ីនតោន (Washington) កាល​ពី​ថ្ងៃ​ទី៣ ខែ​មេសា ឆ្នាំ​២០១៣។
RFA/Taing Sarada
សំឡេង​ហ៊ោ​កញ្ជ្រៀវ​ទះ​ដៃ​របស់​អ្នក​ចូលរួម​ជាង ២​ពាន់​នាក់ អបអរ​សាទរ​ដល់​ភាព​អង់អាច​ក្លាហាន​របស់​អ្នកស្រី ទេព វន្នី តំណាង​អ្នក​ភូមិ​បឹងកក់ បញ្ចប់​ទៅ​នៅ​មុន​ការ​ប្រគល់​ពាន​រង្វាន់​ស្ត្រី​ភាព​ជា​មេ​ដឹកនាំ​ពិភពលោក របស់​អង្គការ​វ៉ាយថល វ៉យស៍ (Vital Voices) ក្នុង​រដ្ឋធានី​វ៉ាស៊ីនតោន (Washington)។
អ្នកស្រី ទេព វន្នី បាន​សម្ដែង​ក្តី​រំភើប​ចំពោះ​មុខ​មហាជន រួម​ទាំង​អនុ​ប្រធានាធិបតី​សហរដ្ឋ​អាមេរិក លោក ចូ បាយឌិន (Joe Biden) និង​អតីត​រដ្ឋមន្ត្រី​ក្រសួង​ការ​បរទេស​អ្នកស្រី ហ៊ីលឡារី គ្លីនតុន (Hillary Clinton) ថា អ្នកស្រី​នឹង​នៅ​តែ​បន្ត​ភាព​អង់អាច​ក្លាហាន​របស់​ខ្លួន​ត​ទៅ​ទៀត ដោយ​ឥត​រុញរា​ក្នុង​ការ​តស៊ូ​ដើម្បី​ឲ្យ​មាន​ដំណោះស្រាយ​សមរម្យ​ដល់​សហគមន៍​របស់​អ្នកស្រី និង​ជំរុញ​ឲ្យ​មាន​ការ​ដោះលែង​អ្នកស្រី យ៉ោម បុប្ផា តំណាង​អ្នក​ភូមិ​បឹងកក់ ម្នាក់​ទៀត ដែល​កំពុង​ជាប់​ពន្ធនាគារ។
អ្នកស្រី ទេព វន្នី ថ្លែង​ប្រាប់​វិទ្យុ​អាស៊ីសេរី នៅ​ក្នុង​មជ្ឈមណ្ឌល​វប្បធម៌​ខេនណឺឌី សិនធឺ (Kennedy Center) ថា ពាន​រង្វាន់​ដែល​អ្នកស្រី​ទទួល​បាន គឺ​ដើម្បី​ពលរដ្ឋ​សហគមន៍​តំបន់​បឹងកក់ និង​ពលរដ្ឋ​រងគ្រោះ​ដោយ​ការ​បណ្ដេញ​ចេញ​ទាំង​បង្ខំ​ជាច្រើន​ទៀត៖ «វា​ជា​ពាន​សម្រាប់​ខ្ញុំ ក៏​ដូច​ជា​សម្រាប់​ពលរដ្ឋ​តំបន់​បឹងកក់ ក៏​ដូច​ពលរដ្ឋ​ស្ត្រី​ដទៃ​ទៀត ដែល​កំពុង​រងគ្រោះ​ដោយ​ការ​បណ្ដេញ​ចេញ​ហ្នឹង គឺ​មាន​សារសំខាន់​សម្រាប់​ពួក​គេ​ណាស់។ សំឡេង​របស់​ពួក​គាត់ មាន​ការ​ទទួល​ស្គាល់ ហើយ​ពិភពលោក​បាន​ឮ និង​បាន​គាំទ្រ ហើយ​គេ​មិន​ឲ្យ​យើង​នៅ​ឯកោ​ទេ។ ពេល​ទៅ​វិញ តស៊ូ​មតិ​ទៀត តវ៉ា​ទៀត ខ្ញុំ​សង្ឃឹម​ថា​ពេល​ខាង​មុខ​នឹង​មាន​លទ្ធផល​ល្អ​សម្រាប់​អ្នកស្រី យ៉ោម បុប្ផា»
នៅ​ក្នុង​ឱកាស​នៃ​ការ​ទទួល​ពាន​រង្វាន់​នេះ អ្នកស្រី ទេព វន្នី បាន​ជួប​សន្ទនា​ជាមួយ​អ្នកស្រី ហ៊ីលឡារី គ្លីនតុន និង​លោក ចូ បាយឌិន អនុ​ប្រធានាធិបតី​សហរដ្ឋ​អាមេរិក ព្រម​ទាំង​បាន​ថត​ឈរ​កៀក​ស្និទ្ធស្នាល​ជាមួយ​អ្នក​ទាំង​ពីរ​ផង​ដែរ។
អង្គការ​វ៉ាយថល វ៉យស៍ កាល​ពី​យប់​ថ្ងៃ​អង្គារ បាន​ប្រគល់​ពាន​រង្វាន់​មេដាយ​ភាព​ជា​អ្នក​ដឹកនាំ​ពិភពលោក​ដល់​ស្ត្រី​មក​ពី​ប្រទេស​កម្ពុជា ប៉ាគីស្ថាន (Pakistan) សូម៉ាលី (Somalia) ប៉ាឡេស្ទីន (Palestine) ប្រេស៊ីល និង​ដល់​បងប្អូន​ប្រុសៗ​ចំនួន​បី​នាក់​ពី​ប្រទេស​ឥណ្ឌា ដែល​តស៊ូ​ប្រឆាំង​អំពើ​ហិង្សា​លើ​ស្ត្រី​ភេទ និង​ការ​ជួញ​ដូរ​មនុស្ស។
អ្នក​ចូលរួម​ទស្សនា និង​អបអរ​ក្នុង​ពិធី​ប្រគល់​ពាន​នេះ លោក ដេវីដ ព្រេត (David Pred) ថ្លែង​ថា ពាន​រង្វាន់​ដែល​អ្នកស្រី ទេព វន្នី ទទួល​បាន​ជា​កិត្តិយស​មួយ​ដ៏​ធំធេង​ក្នុង​ការ​លើក​ទឹក​ចិត្ត​ដល់​ក្រុម​សកម្មជន​ដីធ្លី​នៅ​កម្ពុជា ដើម្បី​សេរីភាព និង​ការ​ទាមទារ​សិទ្ធិ​លំនៅឋាន​របស់​ពួក​គេ៖ «នេះ​ជា​មហា​កិត្តិយស​ណាស់​សម្រាប់​អ្នកស្រី ទេព វន្នី និង​សម្រាប់​សហគមន៍​របស់​អ្នកស្រី​ទាំងមូល ក៏​ដូច​ជា​ពលរដ្ឋ​ខ្មែរ​ទូទៅ។ ខ្ញុំ​គិត​ថា ពាន​នេះ​នឹង​អាច​នាំ​ឲ្យ​ក្រុម​អ្នក​តវ៉ា​ទាំងអស់​មាន​កម្លាំង​ចិត្ត​ត​ទៅ​ទៀត ដើម្បី​ទាមទារ​សិទ្ធិ​លំនៅឋាន យុត្តិធម៌ និង​បញ្ឈប់​ការ​បណ្ដេញ​ពលរដ្ឋ​ចេញ​ពី​លំនៅឋាន។ ពាន​រង្វាន់​នេះ​ដើរ​តួ​យ៉ាង​សំខាន់​ក្នុង​ការ​បង្ហាញ​មិត្ត​រួម​សហគមន៍​របស់​អ្នកស្រី ទេព វន្នី ដែល​តែង​តស៊ូ​ដឹកនាំ​សហគមន៍​ដើម្បី​លទ្ធិប្រជាធិបតេយ្យ និង​សិទ្ធិ​មនុស្ស​នៅ​កម្ពុជា»
លោក​សង្ឃឹម​ថា ពាន​រង្វាន់​នេះ​នឹង​ជា​សារ​មួយ​ទៅ​កាន់​រដ្ឋាភិបាល​កម្ពុជា ដើម្បី​ឲ្យ​បញ្ឈប់​ការ​ប្រើ​អំពើ​ហិង្សា ការ​ចាប់​ខ្លួន ឬ​ឃុំ​ខ្លួន​ក្រុម​អ្នក​ការពារ​សិទ្ធិ​មនុស្ស។
ចំណែក​លោក សៀ ភារម្យ នាយក​លេខាធិការដ្ឋាន​ក្រុម​ការងារ​ពិសេស​នៃ​សិទ្ធិ​លំនៅឋាន ដែល​ចូលរួម​ក្នុង​ពិធី​នោះ​ដែរ បាន​សម្ដែង​មោទនភាព​ចំពោះ​អ្នកស្រី ទេព វន្នី៖ «នេះ​ជា​រង្វាន់​មួយ​ដ៏​អស្ចារ្យ ដែល​មាន​ការ​គាំទ្រ​យ៉ាង​ខ្លាំងក្លា​ពី​លោកស្រី ហ៊ីលឡារី គ្លីនតុន ក៏​ដូច​ជា​លោក​អនុ​ប្រធានាធិបតី​សហរដ្ឋ​អាមេរិក ចូ បាយឌិន ដែល​បាន​គាំទ្រ​យ៉ាង​ខ្លាំង​ចំពោះ​ស្ត្រី ហើយ​ជាពិសេស​ចង់​ឃើញ​អំណាច​របស់​ស្ត្រី​ដើម្បី​មាន​ការ​ផ្លាស់​ប្ដូរ កុំ​ឲ្យ​មាន​ការ​ប្រើ​អំពើ​ហិង្សា​ទៅ​លើ​ស្ត្រី»
រីឯ​អ្នក​ចូលរួម​ម្នាក់​ទៀត គឺ​អ្នកស្រី ឌែល ហាឌិន ថ្លែង​ថា អ្នកស្រី​ពេញ​ចិត្ត​ជា​ទី​បំផុត​ក្នុង​ការ​លើក​ទឹក​ចិត្ត​ដល់​ក្រុម​អ្នក​ទទួល​ពាន​ទាំងអស់ ដែល​ពួក​គេ​សុទ្ធ​តែ​ជា​មនុស្ស​ក្លាហាន ហើយ​ភាព​ក្លាហាន​នេះ​ជា​អាវុធ​ដ៏​សំខាន់​បំផុត​ក្នុង​ការ​ផ្លាស់​ប្ដូរ​សង្គម៖ «យើង​មក​ទី​នេះ​ទាំងអស់​គ្នា ដើម្បី​ផ្តល់​កិត្តិយស​ដល់​ម្ចាស់​ពាន​រង្វាន់​ទាំងអស់​នៅ​យប់​នេះ ដែល​មក​ពី​តាម​បណ្ដា​ប្រទេស​ផ្សេងៗ​លើ​ពិភពលោក។ ពួក​គេ​គ្រប់​រូប​សុទ្ធ​តែ​បាន​ប្រយុទ្ធ​ប្រឆាំង​ដើម្បី​សិទ្ធិ​សេរីភាព តាម​ឆន្ទៈ​ដ៏​មុតមាំ»
ទាំង​លោក​អនុ​ប្រធានាធិបតី ចូ បាយឌិន និង​អ្នកស្រី ហ៊ីលឡារី គ្លីនតុន អតីត​រដ្ឋមន្ត្រី​ការ​បរទេស​សហរដ្ឋ​អាមេរិក ថ្លែង​ថា សិទ្ធិ​ស្ត្រី​ជា​សិទ្ធិ​មនុស្ស ហើយ​សហរដ្ឋ​អាមេរិក នឹង​ជំរុញ​ឲ្យ​មាន​ការ​លប់​បំបាត់​រាល់​ទម្រង់​នៃ​ការ​ប្រើ​អំពើ​ហិង្សា​គ្រប់​រូបភាព​មក​លើ​ស្ត្រី​ក្នុង​ពិភពលោក ហើយ​ដើម្បី​ឲ្យ​ប្រាកដ​ថា ជន​ដៃ​ដល់​ក្នុង​ករណី​នេះ ត្រូវ​ទទួល​ខុស​ត្រូវ​ចំពោះ​មុខ​ច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ក្មេង​ស្រី​អាយុ​៨​ឆ្នាំ​រ៉ាប់រង​ចិញ្ចឹម​សមាជិក​គ្រួសារ​៥​នាក់



ស្តាប់សំឡេងដោយ អ៊ុក សាវបូរី  

កុមារ​កំព្រា ក្រីក្រ ៣០៥
កុមារី ធិន ចន្ធី អាយុ ៨​ឆ្នាំ និង​ប្អូន​ប្រុស​ពៅ​អាយុ ៣​ឆ្នាំ អូស​រទេះ​ដឹក​ទឹក ក្នុង​ភូមិ​នៀល ឃុំ​គូស ស្រុក​ត្រាំកក់ ខេត្ត​តាកែវ កាល​ពី​ថ្ងៃ​ទី២៥ ខែ​មីនា ឆ្នាំ​២០១៣។
RFA/Ouk Savborey


នៅ​ឃុំ​គូស ស្រុក​ត្រាំកក់ ខេត្ត​តាកែវ មាន​ក្មេង​ស្រី​អាយុ ៨​ឆ្នាំ​មួយ​រូប បាន​ឈប់​រៀន ហើយ​ទៅ​រក​ស៊ី​ដើម្បី​ចិញ្ចឹម​មនុស្ស​ចំនួន ៥​នាក់​ជា​សមាជិក​គ្រួសារ។ មនុស្ស​ទាំង ៥​នាក់​នោះ មាន​ជីដូន​ចាស់​មួយ​រូប និង​បង​ប្អូន​ប្រុស ៣​នាក់។ ការ​ប្រឹង​រក​ស៊ី ដើម្បី​ចិញ្ចឹម​មនុស្ស​ជាច្រើន​នាក់​ក្នុង​គ្រួសារ ធ្វើ​ឲ្យ​មាន​ការ​ចាប់​អារម្មណ៍​ពី​សំណាក់​ប្រជាពលរដ្ឋ​ជាច្រើន​នាក់។
ភាព​ទាល់ច្រក បង្ខំ​ឲ្យ​កុមារី ធិន ចន្ធី ទើប​មាន​អាយុ ៨​ឆ្នាំ ស្ថិត​នៅ​ក្នុង​ភាព​ជា​កុមារ ទៅ​ធានា​រ៉ាប់រង​ជីវភាព​ក្រុម​គ្រួសារ​ប្រមាណ ៣​ឆ្នាំ​មក​នេះ។ កុមារី ធិន ចន្ធី រស់នៅ​ភូមិ​នៀល ឃុំ​គូស មាន​ចម្ងាយ​ប្រមាណ ១៤​គីឡូម៉ែត្រ​ពី​សាលា​ស្រុក​អង្គតាសោម ខេត្ត​តាកែវ និង​នៅ​ជិត​ភ្នំ​ដំរីរមៀល។
កុមារី ធិន ចន្ធី អះអាង​ថា ភ្នំ​ដំរីរមៀល ជា​ភ្នំ​សម្បូរ​ធនធាន​ដែល​នាង​អាច​រក​អង្ក្រង ស្លឹក​រងៀង អុស ជាដើម លក់​ចិញ្ចឹម​គ្រួសារ​នាង។
ថ្ងៃ​ច័ន្ទ ដើម​សប្ដាហ៍​ទី​៤ នៃ​ខែ​មីនា កុមារី ធិន ចន្ធី មិន​បាន​ទៅ​សាលា​ទេ។ កុមារី​នៅ​អូស​ទឹក និង​រក​អង្ក្រង​ផ្សំ​សម្រាប់​ធ្វើ​ម្ហូប និង​សម្រាប់​លក់៖ «ខ្ញុំ​ដង​ទឹក​ពី​ត្រពាំង ត្រពាំង​របស់​គេ​ទឹក​នោះ​មាន​ពណ៌​ស្រដៀង​ខ្មៅ។ ទឹក​នេះ ខ្ញុំ​ទុក​លាង​ចាន។ ខ្ញុំ​អូស ថ្ងៃ​ណា​នេះ ខ្ញុំ​រែក​ខ្ញុំ​ខ្ជិល​អូស​ខ្ញុំ​រែក»
កុមារី​បាន​ប្រាប់​ថា ដោយសារ​តែ​ជីដូន​ឈឺ មិន​អាច​រក​អ្វី​មក​ចិញ្ចឹម​ចៅ​ទាំង ៤​នាក់​បាន ទើប​នាង​ដើរ​ទៅ​ភ្នំ​ស្វែង​រក​សម្បុក​អង្ក្រង និង​អុស មក​ផ្សំ​លក់​ដើម្បី​ទិញ​ស្បៀង៖ «១​ថ្ងៃ ១​ម៉ឺន ២​ម៉ឺន ខ្ញុំ​ទៅ​គោះ​អង្ក្រង​នៅ​ឯ​ភ្នំ​ឯ​ណោះ ២​នាក់​បង»
កុមារី​ឲ្យ​ដឹង​ថា ក្រោយ​ពី​ឪពុក​ម្តាយ​ស្លាប់ បង​ប្អូន​នាង ៤​នាក់​កំព្រា ត្រូវ​ជីដូន​ខាង​ម្តាយ​ជួយ​មើល​ថែទាំ ប៉ុន្តែ​ដោយសារ​ជីដូន​ឈឺ​ក្រោក​មិន​សូវ​បាន​យូរ ចេះ​តែ​វិល​មុខ ទើប​កុមារី និង​បង​ប្រុស​នាំគ្នា​ស្វែង​រក​ចំណូល​ពី​ការ​លក់​អង្ក្រង និង​ស្លឹក​ឈើ​ក្នុង​ព្រៃ​ភ្នំ​មក​លក់។ កុមារី​ឲ្យ​ដឹង​ទៀត​ថា នៅ​ពេល​បាន​អង្ក្រង និង​ស្លឹក​រងៀង ឬ​អុស រក​បាន​ពី​ភ្នំ​ដំរីរមៀល យក​ទៅ​លក់ គាត់​ត្រូវ​ដើរ​តាំង​ពី​ភ្នំ​ដំរីរមៀល ទៅ​ដល់​ផ្សារ​ត្រាំកក់ ចម្ងាយ ៦​គីឡូម៉ែត្រ ដើម្បី​លក់​របស់​រក​បាន​នោះ​ប្ដូរ​យក​ប្រាក់​ទិញ​អង្ករ​ ឬ​អំបិល ត្រី​សាច់​ជាដើម ហើយ​ដើរ​មក​ផ្ទះ​វិញ ៣​គីឡូម៉ែត្រ​ទៀត៖ «យាយ​គាត់​ឈឺ គាត់​ហូប​បាយ​អត់​បាន។ ខ្ញុំ​ដើរ​កាប់​ក្តាម រក​អង្ក្រង​បាន​យក​លក់ យក​លុយ​ចាយ និង​រៀន។ លក់​មួយ​កូន​ចាន ១​ពាន់​រៀល ថ្ងៃ​ណា​ខ្ញុំ​រៀន​អត់ ថ្ងៃ​ណា​ខ្ញុំ​អត់​រៀន លក់​បាន»
កុមារា ធិន ចំរើន អាយុ ១០​ឆ្នាំ ថ្លែង​ថា ឪពុក​ម្តាយ​គាត់​បាន​ស្លាប់​មិន​ដឹង​នៅ​ទីណា​ទេ ព្រោះ​ចេញ​ទៅ​ធ្វើ​កម្មករ​សំណង់​នៅ​ប្រទេស​ថៃ។ ៥​ឆ្នាំ​ក្រោយ​មក ឮ​ថា​ស្លាប់​បាត់​ទៅ​ហើយ។ កុមារា​បន្ត​ថា ជីដូន​ឈឺ​សម្រាក​លើ​កន្ទេល មាន​តែ​គាត់ និង​ប្អូន​ស្រី​ទេ ដែល​អាច​រក​ចំណូល​ចិញ្ចឹម​ប្អូន​តូចៗ​បាន។ ពួក​គេ​ជួយ​គ្នា​ទៅ​វិញ​ទៅ​មក និង​អត់​ធ្មត់​នៅ​ពេល​ខ្វះខាត​អាហារ​ម្តង​ម្កាល។ ពួក​គេ​មិន​ចេះ​ខ្ចី​បុល​នរណា​ឡើយ ព្រោះ​នៅ​តូច​គ្មាន​គ្រួសារ​ណា​បណ្ដាក់ ឬ​ឲ្យ​ខ្ចី​ទេ ព្រោះ​អ្នក​ភូមិ​គេ​ជួយ​ចិញ្ចឹម​ក្រុម​គ្រួសារ​កុមារ​កំព្រា​នេះ​ច្រើន​ពេក​ហើយ ពួក​គេ​ក៏​មាន​គ្រួសារ​របស់​គេ​ត្រូវ​ចិញ្ចឹម​ដែរ៖ «បង​ប្អូន​ខ្ញុំ​ចេះ​ជួយ​គ្នា។ ជួន​កាល​មាន​ត្រី​អាំង មាន​ត្រី​ងៀត​អី​ចៀន។ ដើរ​រក​អង្ក្រង​រក​អី គោះ​យក​ទៅ​លក់ ហើយ​ទិញ​មក»
ស្ត្រី​មេម៉ាយ​ឈ្មោះ អិត លី អាយុ ៥៤​ឆ្នាំ ត្រូវ​ជា​ជីដូន​របស់​កុមារ​កំព្រា​ទាំង ៤​នាក់ បាន​អះអាង​ថា គាត់​មាន​កូន ៧​នាក់។ ប្ដី​គាត់​ធ្លាក់​ពី​លើ​ដើម​ត្នោត​ស្លាប់​រយៈពេល ១៥​ឆ្នាំ​កន្លង​មក​នេះ។ កូន​ចៅ​បែក​មាន​គ្រួសារ​អស់ គ្មាន​នរណា​បាន​ជួយ​គាត់​វិញ​ទេ។ មិន​តែ​ប៉ុណ្ណោះ គាត់​ត្រូវ​រ៉ាប់រង​ចិញ្ចឹម​ចៅ​កំព្រា ៤​នាក់​នេះ​ទៀត។ តែ ២ ទៅ ៣​ឆ្នាំ​មក​នេះ គាត់​ឧស្សាហ៍​វិល​មុខ និង​ដួល​ញឹកញាប់ ទើប​គាត់​មិន​អាច​ជួយ​អ្វី​ដល់​ចៅ​ទាំង ៤​នាក់​បាន។ បច្ចុប្បន្ន ចៅ​ទាំង ៤​នាក់ មើល​ថែ​គាត់​វិញ ចៅ​ពៅ​គេ​អាយុ ៣​ឆ្នាំ ជួយ​ដង​ទឹក​ឲ្យ​គាត់​ផឹក​ជាដើម៖ «ខ្ញុំ​អត់​ដែល​ហ៊ាន​ដើរ​ទៅ​ណា​ទេ។ ខ្ញុំ​ឈឺ​ដើរ​ខ្លាច​តែ​ដួល។ ខ្ញុំ​ទៅ​ផ្ទះ​ប្រធាន​ភូមិ​ដួល​បាត់​មាត់ បាត់​ក​ទៅ។ បើ​ចៅ​ខ្ញុំ​គ្នា​នៅ​ផ្ទះ រែក​ទឹក​រែក​អី​ដាំ​បាយ​ទៅ ខ្ញុំ​ឈឺ​ដៃ​ឈឺ​ជើង ធ្វើ​អី​អត់​កើត។ កុំ​បាន​មេ​ភូមិ​គាត់​ជួយ​ខ្ញុំ ជួយ​ដោះស្រាយ​ដែរ​ហ្នឹង បាន​អង្ករ បាន​មី បាន​ទឹក​ត្រី ហើយ​លុយ​ឲ្យ​ក្មេងៗ​បាន​ម្នាក់ ១០​ម៉ឺន ហូប​មិន​ដែល​គ្រាន់​ទេ មក​ពី​ខ្ញុំ​មិន​ដែល​មាន​ស្អី​ទេ»
កុមារ​កំព្រា ក្រីក្រ ៣០៥
២៥-មីនា-២០១៣៖ កុមារី ធិន ចន្ធី និង​បង​ប្អូន​ប្រុស ៣​នាក់ រួម​ទាំង​ជីដូន​សម្រាក​នៅ​លើ​គ្រែ ឃុំ​គូស ស្រុក​ត្រាំកក់ ខេត្ត​តាកែវ។ RFA/Ouk Savborey
មេ​ភូមិ​នៀល លោក ណោម សារឿន ថ្លែង​ថា ក្នុង​ភូមិ​នេះ​មាន​មនុស្ស​រស់នៅ ៨៨​គ្រួសារ។ ក្នុង​នោះ​មាន​គ្រួសារ​ជិត​៣០ ដែល​មាន​ជីវភាព​ក្រីក្រ​ខ្លាំង​លំដាប់​លេខ​១ និង​លេខ​២។ ចំណែក​ក្រុម​គ្រួសារ​កុមារី​កំព្រា​នោះ ស្ថិត​ឋានៈ​ក្រីក្រ​បំផុត។ លោក​ថា គ្រួសារ​នេះ​បាន​ទទួល​ការ​ឧបត្ថម្ភ​ពី​អាជ្ញាធរ​ស្រុក​ត្រាំកក់ អាជ្ញាធរ​ខេត្ត ទីប្រឹក្សា​លោក ហេង សំរិន ប្រធាន​រដ្ឋសភា សប្បុរស​ជន​ក្នុង និង​ក្រៅ​ប្រទេស។ សប្បុរស​ជន​ខ្លះ​ជួយ​ទិញ​ស័ង្កសី​ឲ្យ ដើម្បី​ប្រក់​ផ្ទះ ខ្លះ​ជួយ​ទិញ​ស្លឹក​បាំង​ជញ្ជាំង ខ្លះ​ជួយ​អង្ករ ខ្លះ​កន្ទេល ក្រមា ខ្លះ​សម្លៀកបំពាក់ ខ្លះ​ថវិកា។
ចំណែក​រូប​គាត់ ជា​អាជ្ញាធរ​ភូមិ​ជួយ​ដឹក​ក្មេង​ធំៗ​ទាំង ២​នាក់​បង​ប្អូន​ទៅ​សាលា​រៀន ព្រោះ​ចង់​ឲ្យ​គេ​រៀន​អាច​ចេះ​អាន​អក្សរ​បាន​ខ្លះ៖ «ដោយសារ​ពី​មុន គាត់​ដំបូល​ស្លឹក មិន​មាន​ស័ង្កសី​ដូច​សព្វថ្ងៃ​នេះ​ទេ ដោយ​ខាង​សម្ដេច ហេង សំរិន គាត់​បាន​ជួយ និង​សប្បុរស​ជន​មក​ពី​សៀមរាប។ ខ្ញុំ​ក៏​មិន​បាន​ស្គាល់​គាត់​ដែរ គាត់​មក​បាន​ជួយ​ឧបត្ថម្ភ​ជា​ថវិកា​មួយ​ចំនួន ហើយ​រាជ​រដ្ឋាភិបាល​ក៏​បាន​ជួយ​ដែរ តែ​វា​មិន​បាន​គ្រប់​ចំនួន​នៅ​ក្នុង​ក្រុម​គ្រួសារ​របស់​គាត់​ទេ ដោយសារ​គាត់​ក្រីក្រ​ពេក។ តែ​សប្បុរស​ជន​ដទៃ​ទៀត គាត់​បាន​ជួយ​ហូរហែ»
ក្នុង​ថ្ងៃ​ច័ន្ទ ទី២៥ ខែ​មីនា នោះ​ដែរ ក្រុម​ប្រឹក្សា​ខេត្ត​តាកែវ ដឹកនាំ​ដោយ​លោក ម៉ៅ សុផល បាន​ទិញ​កង់​មួយ​គ្រឿង មី ២​កេះ សម្លៀកបំពាក់ រួម​ទាំង​ថវិកា​ច្រើន​ម៉ឺន​រៀល ជូន​បង​ប្អូន​កុមារី ធិន ចន្ធី។
លោក ម៉ៅ សុផល ថ្លែង​ថា លោក​នឹង​ស្នើសុំ​ទៅ​កាកបាទក្រហម​កម្ពុជា និង​ក្រសួង​សង្គមកិច្ច ឲ្យ​ជួយ​ផ្តល់​ស្បៀង​ឲ្យ​បាន​រាល់​ខែ​ដល់​ក្រុម​គ្រួសារ​ក្រីក្រ​នេះ ដើម្បី​ការពារ​កុំ​ឲ្យ​កុមារី និង​បង​ប្រុស​ផ្អាក​រៀន ព្រោះ​តែ​ធានា​រ៉ាប់រង​ការ​ចិញ្ចឹម​ក្រុម​គ្រួសារ​បែប​នេះ​ត​ទៅ​ទៀត៖ «យើង​បើ​អត់​ជួយ​ក្មេង​នេះ​ទេ គឺ​ទៅ​ថ្ងៃ​អនាគត ក្មេង​នេះ​គឺ​ប្រៀប​ដូច​ពេល​យប់ គឺ​អត់​មាន​ពន្លឺ ពីព្រោះ​អនាគត​ក្មេង​នេះ​នឹង​បោះ​បង់​ការ​សិក្សា​នៅ​ពេល​ដែល​យើង​អត់​ជួយ​គាត់។ អីចឹង ខ្ញុំ​សូម​អំពាវនាវ​ដល់​រដ្ឋាភិបាល ឬ​ក៏​ខ្មែរ​ដែល​នៅ​ឯ​នាយ​សមុទ្រ សូម​ជួយ​ក្មេង​នេះ ធ្វើ​ម៉េច​ឲ្យ​គាត់​មាន​អនាគត​ល្អ​ផង។ ពេល​ដែល​ខ្ញុំ​ត្រឡប់​ទៅ​វិញ គឺ​ខ្ញុំ​ប្រាប់​ខាង​ផ្នែក​កាកបាទ​ក្រហម ដើម្បី​ឲ្យ​ជួយ​ដល់​យាយ ហើយ​និង​ក្មេង ៤​នាក់​នេះ ដើម្បី​ជួយ​បន្ត​ទៅ​មុខ​ទៀត»
នៅ​ថ្ងៃ​នោះ​ដែរ ក្រុម​ការងារ​គណបក្ស​សង្គ្រោះ​ជាតិ បាន​ផ្តល់​ថវិកា​ចំនួន ១០០​ដុល្លារ និង​ប្រាក់​រៀល​ច្រើន​ម៉ឺន​ទៀត ជួយ​ក្រុម​គ្រួសារ​កុមារី​កំព្រា​នោះ​ដែរ។
អាជ្ញាធរ​ឃុំ​គូស បាន​ថ្លែង​ថា មិន​មែន​តែ​ក្រុម​គ្រួសារ​កុមារី​មួយ​នេះ​ទេ​ដែល​ជួប​ការ​លំបាក​នោះ គឺ​នៅ​ក្នុង​ឃុំ​មាន​គ្រួសារ​ច្រើន​ទៀត បាន​ធ្វើ​ចំណាក​ស្រុក ព្រោះ​តែ​ការ​ធ្វើ​ស្រែ និង​ដាំ​ដំណាំ​រួម​ផ្សំ​មិន​អាច​រក​ប្រាក់​ចំណូល​ផ្គត់ផ្គង់​ជីវភាព​បាន​ប្រចាំ​ថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បីកូន​អាយុ​៥​ខែ​តាម​​រក​ប្ដី​ជា​និស្សិត​ពេល​​​ជួប​កំពុង​សំពះ​ផ្ទឹម​​ជាមួយ​ស្រី​ថ្មី​​ជា​គ្រូពេទ្យ​


អត្ថបទ

ខេត្ដ​តាកែវ៖ ពិធីមង្គលការ​មួយ​បាន ប្រ​ព្រឹ​ត្ដទៅ​យ៉ាង​គគ្រឹកគគ្រេង​លាយឡំ សូរសំឡេង​ភ្លេង​ប្រពៃណី​ពីរោះ​យ៉ាង​រណ្ដំ​។ ប៉ុន្ដែ​សូរសំឡេង​ភ្លេង​ការ​នេះ​បែរជា​បង្ក ការភ្ញាក់ផ្អើល​ដល់​ភ្ញៀវ​ស្រឡាំងកាំង គ្រប់ៗ​គ្នា គ្រា​ដែលមាន​កម្មការិនី​ម្នា​ក់បាន បីកូន​ប្រុស​ទៅដល់​ក្នុង​រោងការ​រួច​អះអាង ថា កូនកំលោះ​កំពុង​រៀបការ​នេះ​ជា​ប្ដី​របស់​នាង ហើយ​កូន​ដែល​នាង​កំពុង​ព​ជា​កូន របស់គេ (​កូនកំលោះ​) ។ កាត់សក់​ពិធីសំពះផ្ទឹម​ត្រូវ​មេឃុំ​សម្រេច​ផ្អាក​ដើម្បី​នាំ​កម្មការិនី​ដែល​អះអាង ជា​ប្រពន្ធ​របស់​កូនកំលោះ​ទៅ​ដោះស្រាយ ជាមួយ​ម្ដាយ​ឪពុក​ខាង​កូនកំលោះ​សិន ។ ករណី​ស្ដ្រី​កម្មការិនី​បីកូន​ប្រុស​អាយុ ៥​ខែ​តាមរក​ប្ដី​ជា​និស្សិត ហើយក៏​ជួប កំពុង​សំពះ​ផ្ទឹម​ជាមួយ​ស្រី​ថ្មី​ជា​អ្នកគ្រូ ពេទ្យ​នេះ​បាន​កើតឡើង​នៅវេលា​ម៉ោង ៨​ព្រឹក ថ្ងៃអាទិត្យ​ទី​២៤ ខែមីនា ឆ្នាំ ២០១៣ ក្នុងភូមិ​ត្រញំង​ទ្រា ឃុំរ​រៀង ស្រុក​សំរោង ខេត្ដ​តាកែវ ។ អ្នកភូមិ​ត្រញំង​ទ្រា បានឱ្យដឹងថា កូន ក្រមុំ​ដែល​រៀបការ​ជាមួយ​កូនកំលោះ មានឈ្មោះ អ៊ឹម សារី អាយុ​២៤​ឆ្នាំ រស់ នៅ​ភូមិ ឃុំ​កើតហេតុ​ខាងលើ ។

បើតាម​ការអះអាង​រប​ស់​ស្ដ្រី ជ្រុ​ន ចាន់ណា អាយុ​២៤​ឆ្នាំ ស្នាក់នៅ​ភូមិ ត្នោតជ្រំ សង្កាត់​បឹងទំពុន ខណ្ឌមានជ័យ ជា​ប្រពន្ធ​ទៅ​ទាន់​ប្ដី​កំពុង​រៀបការ​ឱ្យដឹង ថា កូនកំលោះ​រៀបការ​ឈ្មោះ ប៉ែត ស្រៀវ អាយុ​២៦​ឆ្នាំ រស់នៅ​ភូមិ​ម្រះព្រៅ ឃុំ​ចំបក់ ស្រុក​បាទី ខេត្ដ​តាកែវ ជា និស្សិត​រៀន​នៅ​ភ្នំពេញ ។ ស្ដ្រី​ជ្រុ​ន ចាន់ណា រៀបរាប់ថា នាង​បាន​ស្រឡាញ់គ្នា​ជាមួយ​បុរស​ប៉ែត ស្រៀវ អស់​រយៈពេល​ជាង​៣​ឆ្នាំ​មកហើយ ប៉ុន្ដែ មិនបាន​រៀបការ​តាម​ប្រពៃណី​ទេ តែ​ពួក គេ​បាន​សែនព្រេន​ត្រឹមត្រូវ មាន​ចាស់ទុំ ទាំងសងខាង​ដឹងឮ​។ នៅពេលដែល​នាង និង​ឈ្មោះ ប៉ែត ស្រៀវ បានរៀបចំ​សែន ព្រេន ក៏មាន​លោកតា​អាចារ្យ​ឈ្មោះ ពូន ជា​សាច់ញាតិ​នឹង​កូនកំលោះ​ប៉ែត ស្រៀវ ចូលរួម​ផ្សំផ្គុំ​ក្នុង​ពិធី​សែន​នោះដែរ ។

នៅក្នុង​សាលាឃុំ​រវៀង នាង​កម្មការិនី ក្នុង​ដៃ​ពកូន​ប្រុស​រលាក់​កុំឱ្យ​យំ​បណ្ដើរ ដៃ​ម្ខាង​ជូត​ទឹកភ្នែក​បណ្ដើរ​បាន​រៀបរាប់ ទៀតថា នៅពេល​នាង​មាន​ផ្ទៃពោះ​បាន ៤​ខែ បុរស​ជា​ប្ដី​បាន​ចាក​ចេញពី​នាង ហើយ​កូនកំលោះ​រូបនេះ​បាន​ប្រាប់​នាង ថា គាត់​ជាប់​មក​សិក្សា​នៅ​ភ្នំពេញ ហើយ ពេលណា​សិក្សា​ចប់ ពួកគេ​ទាំង​២​នាក់ នឹង​មក​រស់នៅ​ជួបជុំ​ប្រពន្ធ​កូន​ដើម្បី កសាង​សុភមង្គល​ជាមួយគ្នា ។ លោក​មេឃុំរ​វៀង​បាន​កោះហៅ​ឪពុក ម្ដាយ​ខាង​ប្រុស​មករក​ដំណោះស្រាយ ទល់មុខ​ជាមួយ​ស្ដ្រី​ជា​កូនប្រសា និង ចំពោះមុខ​ចៅប្រុស ប៉ុន្ដែ​ស្ដ្រី​ឈ្មោះ ផៃ សារ៉ន ជា​ម្ដាយ​កូនកំលោះ និយាយ​បែប មិន​សមជា​ចាស់ទុំ​ថា គាត់​មិន​ទទួល ស្គាល់​កូនប្រសា​ឥត​ខាន់ស្លា​នេះ​ទេ ហើយ កុំមក​អុកឡុក​ក្នុង​ពិធីមង្គលការ​កូន ប្រុស​គាត់​ឱ្យសោះ ប្រយ័ត្ន​គាត់​ប្ដឹង​ឡើង តុលាការ ។ ភាព​តានតឹង ខណៈ​ពិធីមង្គលការ​មាន ភ្ញៀវ​ជួបជុំ​ត្រៀបត្រា​ពេញ​រោង​ពិធី ទើប ការសម្របសម្រួល​រប​ស់លោក​មេឃុំ ក្នុងន័យ​អង្វរ​ពី​ម្ដាយ​កូនកំលោះ ទីបញ្ចប់ ស្ដ្រី​ជ្រុ​ន ចាន់ណា សុខ​ចិ​ត្ដ​លះបង់​ប្ដី​ឥត ខាន់ស្លា​ទទួលយក​ប្រាក់​១,៥​លាន​រៀល ទាំង​ទឹកភ្នែក​ហូរ​រហាម​ដើម្បី​យកមក ចិញ្ចឹម​កូនប្រុស​ដ៏​កម្សត់ ព្រោះ​ឪពុក​ជា និស្សិត​មិន​ទទួលស្គាល់​ឈាម​របស់ខ្លួន​។

ការលះបង់​របស់​កម្ម​ការិនី​ជ្រុ​ន ចាន់ណា បានធ្វើឱ្យ​ពិធីមង្គលការ​នេះ​បន្ដ​ឡើង វិញ ប៉ុន្ដែ​ពុំបាន​រៀបចំ​ធ្វើ​ពិធី​អ្វី​ក្រៅ​តែ ការទទួល​ភ្ញៀវ​ចូល​ពិសា​អាហារ​ទាំង​ភាព អាម៉ាស់​ដើម្បី​ទទួល​លុយ​ចំណងដៃ​ទុក សង​ថ្លៃ​តុ​ប៉ុណ្ណោះ ។ ប្រជាពលរដ្ឋ​ក្នុងភូមិ​ដែល​បាន​តាម ដាន​ពិធីមង្គលការ​ដ៏​សោះកក្រោះ​មួយ នេះ​លើកឡើងថា ឪពុកម្ដាយ​ខាង​កូន កំលោះ​មិនគួរ​ធ្វើ​ទង្វើ​បែបនេះ​ទេ​ក្នុងឋានៈ ខ្លួន​ជា ចាស់ទុំ មិន​ទទួលស្គាល់​កូនប្រសា ខណៈដែល​ខ្លួន​បាន​ចូលរួម​ធ្វើ​ពិធី​សែន ព្រេន​ឱ្យ​ពួកគេ​នាពេល​កន្លងមក ។ ម្យ៉ាង វិញទៀត លោក​អាចារ្យ​ឈ្មោះ ពូន ដែល ជា​សាច់ញាតិ​នឹង​កូនកំលោះ​ជា​អ្នក សែនព្រេន​ឱ្យ​ពួកគេ​ទាំង​២​ក៏​មិនគួរ​ក្បត់ ឧត្ដមគតិ​ហើយ​មក​ធ្វើជា​អាចារ្យ​និង ដេញ​វេលា​ឱ្យ​កូនកំលោះ​មក​ការ​សា ជាថ្មី​បែបនេះ​សោះ ។ ស្ដ្រី ជ្រុ​ន ចាន់ណា មុនពេល​ចាកចេញ ពី​សាលាឃុំ​នាង​បាន​សំឡឹងមើល​រោងការ ទាំង​ទឹកភ្នែក​រលីងរលោង ហើយ​បាន និយាយ​ផ្ដាំ​ដល់​នារី​ឯទៀត ពិសេស​កម្ម ការិនី​តាម​រោងចក្រ សូមកុំ​ឱ្យធ្វើ​ដូច​រូប នាង​ដែល​ជឿ​ទៅលើ​និស្សិត​ដូច​អា​ម្សៀ ម្នាក់​ឈ្មោះ ប៉ែត ស្រៀវ ព្រោះ​និស្សិត បែបនេះ គេ​ហៅថា​និស្សិត​បោក​យក​ខ្លួន ប្រាណ​តែ​មិន​ទទួលខុសត្រូវ សូម្បី​ឈាម​មួយ​ដុំ​របស់ខ្លួន​ក៏​គេ​មិន​ទទួលស្គាល់ ផងដែរ ។

មុន​បោះជំហាន​ឡើង​រថយន្ដ​តាក់ស៊ី វិល​មក​ភ្នំពេញ​បើទោះជា​នាង​មិន​បញ្ចេញ វាចា តែ​តាម​ទឹកមុខ​ស្រពាប់​ស្រពោន របស់​នាង​បាន​បង្ហាញថា ភ្លេង​ការដែល ឮសូរ​ល្វើយៗ​នៅ​កណ្ដាល​ភូមិ​ជា​បណ្ដាំ ដល់​កូនប្រុស​ដែល​ត្រូវ​កូនក្រមុំ​ជា​គ្រូ ពេទ្យ​ឆក់យក​ប៉ាៗ​ពី​បេះដូង​ម្ដាយ ហើយ ចាប់ពី​ថ្ងៃនេះ​តទៅ​កូនប្រុស​ដ៏​កម្សត់ លែង​បាន​ជួប​មុខ​និស្សិត​ត្បាញ​អាយ សប្បាយ​ហើយ​ដោះដៃ​នេះ​ទៀតហើយ ។ បែបនេះ គេ​ហៅថា​ជា​មនុស្ស​ប្រុស ដែល​គ្មាន​ការទទួលខុសត្រូវ ហើយ​អ្នក គ្រូពេទ្យ​ដែល​ទទួលយក​មនុស្ស​គ្មាន​ការ ទទួលខុសត្រូវ​បែបនេះ ក៏​គ្មាន​អនាគត​ដែរ ៕​

សំណើ​វិសោធនកម្ម​ចំពោះ​ការ​ផ្ដន្ទាទោស​ការ​ចរាចរណ៍​រូបភាព​អាសអាភាស


គណៈកម្មាធិការ​ជាតិ​លើក​កម្ពស់​សីលធម៌​សង្គម តម្លៃ​ស្ត្រី​ខ្មែរ និង​គ្រួសារ​ខ្មែរ នៅ​ថ្ងៃ​ទី២០ ខែ​កុម្ភៈ បាន​បង្ហាញ​ស្នាដៃ​ការងារ​របស់​ខ្លួន​ក្នុង​ឆ្នាំ​២០១២ និង​លើក​ផែន​ការ​សម្រាប់​ឆ្នាំ​២០១៣។

គណៈកម្មាធិការ​នេះ​បាន​លើក​ឡើង​ពី​កិច្ច​ខិតខំ​បំពេញ​ការងារ ដើម្បី​អប់រំ​ផ្សព្វផ្សាយ និង​បង្ក្រាប​បទ​ល្មើស​សំដៅ​លើក​កម្ពស់​សីលធម៌​សង្គម។ ស្រប​គ្នា​នេះ ក៏​បាន​លើក​ឡើង​ពី​ការ​ប្រឈម​ដែល​គណៈកម្មាធិការ​នេះ​ចង់​អោយ​ភាគី​ពាក់ព័ន្ធ​ចូលរួម​ដោះ​ស្រាយ ជាពិសេស​លើ​ការ​ចរាចរណ៍​រូប​ភាព និង​វីដេអូ​អាសអាភាស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រធាន​អង្គការ​ជួយ​ក្មេង​រើស​សំរាម​ជាប់​ជា​វីរ​នារី​ឆ្នើម​របស់ CNN ឆ្នាំ​២០០៨

«គេ​ទូរស័ព្ទ​មក​ប្រាប់​ដែរ មុន​គេ​ប្រកាស CNN ហ្នឹង​ថា សុំ​អបអរ​សាទរ ដែល​អ្នក​ឯង​បាន​ជាប់​ក្នុង​ជម្រើស​ចុង​ក្រោយ​នៅ​លើ​ពិភពលោក​ក្នុង​ចំណោម​៧៥ ប្រទេស​ហ្នឹង។ ខ្ញុំ​គេង​ក៏​មិន​លក់​... នឹក​ឃើញ​ថា វា​មិន​គួរ​ឲ្យ​ជឿ»។

នួន​ភិមាន
លោកស្រី នួន ភិមាន នាយិកា​អង្គការ​លើក​ស្ទួយ​ប្រជាពលរដ្ឋ។
Photo courtesy Nuon Phymean



ខាង​លើ​នេះ​ជា​ប្រសាសន៍ លោកស្រី នួន ភីមាន អាយុ​៣៧​ឆ្នាំ ជា​វីរ​នារី​ម្នាក់ ក្នុង​ចំណោម​វីរជន ១០​នាក់ ប្រចាំ​ទូរទស្សន៍ CNN អាមេរិក ឆ្នាំ​២០០៨ ដែល​បាន​ជ្រើសរើស​ចេញ​ពី​បេក្ខជន បេក្ខនារី ជិត ៤.០០០​នាក់​ក្រោម​ការ​ត្រួត​ពិនិត្យ​ល្អិតល្អន់​ចេញ​ពី​ចំនួន​៧៥​ប្រទេស។ 
លោកស្រី នួន ភីមាន មាន​ស្រុក​កំណើត នៅ​ខេត្ត​កំពង់ចាម ជា​កូន​កំព្រា​ម្តាយ​តាំង​ពី​តូច។ លោកស្រី​អះអាង​ថា មុន​នឹង​ទូរទស្សន៍ CNN អាមេរិក សម្រេច​ជ្រើសរើស​ជា​វីរ​នារី​ឆ្នើម ក្រុម​ការងារ​ស្ថានីយ​ទូរទស្សន៍ CNN នោះ សាកសួរ​ជា​ច្រើន​ម៉ោង​អំពី​ការងារ​របស់​អង្គការ​ដែល​អ្នកស្រី​បង្កើត ដែល​ដាក់​ឈ្មោះ​ថា អង្គការ​លើក​ស្ទួយ​ប្រជាពលរដ្ឋ (PIO) ដែល​ជួយ​កុមារ​រើស​សំរាម កុមារ​ក្រីក្រ និង​ស្រ្តី​ខ្មែរ​គ្មាន​មុខ​របរ​យក​ទៅ​បណ្តុះ​បណ្តាល​ឲ្យ​បាន​រៀន​ពី​ថ្នាក់​មតេ្តយ្យ​រហូត​ដល់​ថ្នាក់​ទី​៩ និង​កុមារី​និង​ស្រ្តី​មួយ​ចំនួន​ទៀត ឲ្យ​រៀន​មុខ​ជំនាញ​ផ្សេងៗ​សម្រាប់​ចិញ្ចឹម​ជីវិត ៦០០​នាក់។
លោកស្រី នួន ភីមាន មាន​ប្រសាសន៍​ដូច្នេះ​ថា ៖ «ខ្ញុំ​គិត​ថា ទោះ​ជា​ក្រ​ក៏​យើង​ត្រូវតែ​ចេះ​អាន ចេះ​សរសេរ​ដែរ ហើយ​បើ​យើង​ចង់​ជួយ​ប្រទេស​ជាតិ​យើង គឺ​យើង​ត្រូវ​មាន​អ្នក​ចេះ​ដឹង​ឲ្យ​ច្រើន។ នេះ​គឺ​ថា បើ​យើង​មិន​មាន​អ្នក​ចេះ​ដឹង​ច្រើន ដូច​ក្លាយ​ជា​ក្មេង​ហិត​កាវ ឆក់ ប្លន់ គឺ​មក​ពី​គ្មាន​ភាព​ចេះ​ដឹង ហើយ​ជា​ពិសេស​ការ​អត់​ឃ្លាន​ហ្នឹង​តែ​ម្ដង»
លោកស្រី​អះអាង​ថា បទ​ពិសោធន៍​រហូត​បាន​ទទួល​ជ័យ​លាភី​នេះ បាន​មក​ពី​ធ្វើ​ការងារ​ជាង​១០​ឆ្នាំ​ជាមួយ​អង្គការ​អន្តរជាតិ​ល្បីៗ​មួយ​ចំនួន ពិសេស​រៀន​ពី​កុមារ​ក្រីក្រ​មួយ​ក្រុម ដែល​រើស​កាក​សំណល់​អាហារ​របស់​លោកស្រី​បោះ​ចោល​នៅ​សួន​ច្បារ​មាត់​ទន្លេ ក្រុង​ភ្នំពេញ ទើប​លោកស្រី​បង្កើត​ជា​អង្គការ​លើក​ស្ទួយ​ប្រជាពលរដ្ឋ ហៅ​កាត់​ថា PIO នេះ ជួយ​កុមារ​ឲ្យ​បាន​រៀន​សូត្រ​និង​មុខ​ជំនាញ។ 
ហើយ​អង្គការ PIO បាន​ជួយ​សហការ​ពី​រដ្ឋាភិបាល​និង​អង្គការ​ក្រៅ​រដ្ឋាភិបាល ទើប​ដំណើរការ​ជួយ​គ្រួសារ​ក្រីក្រ​បាន​រៀន​អក្សរ​និង​មុខ​ជំនាញ​រហូត​ដល់ ៦០០​នាក់។
លោកស្រី នួន ភីមាន មាន​ប្រសាសន៍​ថា ៖ «ជីវិត​ខ្ញុំ​ផ្លាស់​ប្ដូរ​ពេល​ហ្នឹង​តែ​ម្ដង ខ្ញុំ​គិត​ថា ខ្ញុំ​នឹង​ធ្វើ​អ្វី​មួយ​ដែល​ជួយ​ក្មេង​ហ្នឹង​ដោយ​ផ្ទាល់ ព្រោះ​ខ្ញុំ​បាន​ធ្វើការ​បទ​ពិសោធន៍​ជាមួយ UN ជាមួយ​អង្គការ​ផ្សេងៗ​ហ្នឹង​ច្រើន អ៊ីចឹង​ខ្ញុំ​ថា នឹង​ធ្វើ​អ្វី​មួយ​ដើម្បី​ឲ្យ​ជីវិត​ក្មេង​មាន​ការ​ផ្លាស់​ប្ដូរ»
តំណាង​ឲ្យ​ទូរទស្សន៍ CNN ចូលរួម​អបអរ​សាទរ​ដល់​លោកស្រី នួន ភីមាន ជាប់​ជា​វីរ​នារី​ឆ្នើម​ក្នុង​ចំណោម ១០​រូប ប្រចាំ​ទូរទស្សន៍ CNN បាន​ថ្លែង​នៅ​យប់​ថ្ងៃ​អាទិត្យ ទី​៩ ខែ​វិច្ឆិកា​ថា ក្រុម​ការងារ​របស់​ស្ថានីយ​នោះ​បាន​ចុះ​ផ្ទាល់​ដល់​កន្លែង ដែល​លោកស្រី​កំពុង​ធ្វើការ​ជាមួយ​ក្រុម​កុមារ​រើស​សំរាម កុមារ​កំព្រា និង​គ្រួសារ​ក្រីក្រ។ 
រីឯ​ម្ចាស់​ជំនួយ​ផ្សេងៗ​ទៀត កំពុង​ជួយ​ដល់​អង្គការ PIO បាន​ថ្លែង​ថា លោកស្រី នួន ភីមាន បាន​ធ្វើ​ឲ្យ​មាន​ការ​ផ្សព្វផ្សាយ​នៅ​លើ​សកលលោក ឲ្យ​មាន​ចំណាប់​អារម្មណ៍​ដល់​ប្រទេស​កម្ពុជា​អំពី​វិធី​ជួយ​គ្នា ឲ្យ​មាន​មុខ​របរ​និង​ក្លាយ​ពី​កុមារ​អនាថា​ទៅ​រក​ការ​សិក្សា។
រដ្ឋមន្រ្តី​ក្រសួង​ព័ត៌មាន លោក ខៀវ កាញារីទ្ធ មាន​ប្រសាសន៍​ក្នុង​ពិធី​អបអរ​សាទរ​ដល់​លោកស្រី នួន ភីមាន ដែល​ជាប់​ជា​វីរ​នារី​ក្នុង​ចំណោម​១០​រូប ប្រចាំ​ទូរទស្សន៍ CNN អាមេរិក ឆ្នាំ​២០០៨​ថា ៖ «គាត់​ជា​នារី​ដ៏​សាមញ្ញ​ម្នាក់ ប៉ុន្តែ​ល្បី​ឈ្មោះ​នៅ​ក្នុង​ប្រជារាស្រ្ដ ដែល​មាន​ប្រជាជន​ទាំង​អស់ មាន​ជាង ៦​ពាន់​លាន​នាក់​នៅ​លើ​ពិភពលោក។ នេះ​ក៏​ជា​មោទនភាព​មួយ​ដែរ​ចំពោះ​ប្រទេស​កម្ពុជា​យើង​ដែរ ដែល​យើង​បាន​ឃើញ​ថា យើង​មិន​ខ្វះ​ទេ​អ្នក​ដែល​មាន​សុឆន្ទៈ អ្នក​ដែល​មាន​បំណង​ចង់​កសាង​សង្គម​មួយ ឬ​អ្នក​ដែល​មាន​បំណង​ចង់​ជួយ​សង្គម​របស់​យើង។ សព្វ​ថ្ងៃ​នេះ ក្រសួង​ព័ត៌មាន​កំពុង​សហការ​ជាមួយ​អង្គការ​ពលកម្ម​អន្តរជាតិ (ILO) ដើម្បី​ធ្វើ​យ៉ាង​ណា​នៅ​ឆ្នាំ​២០១៥ យើង​ធ្វើ​ឲ្យ​ក្មេង​ដែល​កំពុង​ធ្វើ​ពលកម្ម​ធ្ងន់ធ្ងរ​នេះ ធ្លាក់​នៅ​តិច​ជាង ៨%»
ក្នុង​ពិធី​អបអរ​សាទរ​ដល់​លោកស្រី នួន ភីមាន ជាប់​ជា​វីរ​នារី​ក្នុង​ចំណោម​១០​រូប ប្រចាំ​ទូរទស្សន៍ CNN អាមេរិក ឆ្នាំ​២០០៨ ក្រុម​កុមារៗ​របស់​អង្គការ PIO ក៏​បាន​ចូលរួម​សម្ដែង​សិល្បៈ​ដែរ។
កុមារា ឈិន សុផាត សិស្ស​ថ្នាក់​ទី​២​នៃ​សាលា​អង្គការ PIO អះអាង​ថា គេ​កំពុង​រើស​អេត​ចាយ​នៅ​គំនរ​សំរាម​ស្ទឹងមានជ័យ ស្រាប់​តែ​មាន​អង្គការ PIO ហៅ​ឲ្យ​ចូល​រៀន​ដោយ​មិន​បង់​ប្រាក់​និង​ផ្តល់​របប​អាហារ​ឲ្យ​ទៀត​ផង។
កុមារា ឈិន សុផាត រៀបរាប់​ដូច្នេះ​ថា ៖ «កាល​ពី​មុន​មក ខ្ញុំ​គ្មាន​សង្ឃឹម​ទេ ដល់​ហើយ​ខ្ញុំ​រើស​សំរាម ក៏​ជួប​ម៉ាក់ ភីមាន ហើយ​គាត់​ក៏​នាំ​ខ្ញុំ​មក​ចូល​ក្នុង​សាលា PIO»
កុមារី​កំព្រា ឈ្មោះ ចាន់ណា កើត​នៅ​ស្រុក​ពារាំង​ខេត្ត​ព្រៃវែង អះអាង​ថា សម្លៀក​បំពាក់ របប​អាហារ​ជំនាញ​កែ​សម្ជស្ស​និង​កំពុង​រៀន​ថ្នាក់​ទី​៩ នៅ​អនុវិទ្យាល័យ ជា ស៊ីម សាមគ្គី ផ្តើម​ចេញ​ពី​ការ​ឧបត្ថម្ភ​របស់​នាយិកា​អង្គការ​លើក​ស្ទួយ​ប្រជាពលរដ្ឋ PIO ដែល​មាន​លោកស្រី នួន ភីមាន ជាប់​ជ័យ​លាភី​ជា​វីរនារី​ឆ្នើម​ម្នាក់​ក្នុង​ចំណោម​១០​នាក់ ប្រចាំ​ទូរទស្សន៍ CNN ឆ្នាំ​២០០៨។
កុមារី​សូម​បួងសួង​ឲ្យ​នាយិកា នួន ភីមាន ជាប់​លេខ​១ ក្នុង​ចំណោម​១០​នាក់​នោះ តាមរយៈ​ការ​ជួយ​បោះឆ្នោត​តាម​វ៉ឹបសាយថ៍ CNN.COM/HEROដើម្បី​បាន​ប្រាក់ ១០​ម៉ឺន​ដុល្លារ។
កុមារី ចាន់ណា រៀបរាប់​ដូច្នេះ​ថា ៖ «បើ​សិន​ជា​គាត់​ជាប់​ឆ្នោត​ខាង​នារី​ឆ្នើម ប្រាកដ​ជា​គាត់​មាន​លុយ​ច្រើន​នឹង​ជួយ​អ្នក​ក្រីក្រ រើស​អេតចាយ ដូចជា​រូប​ខ្ញុំ​និង​បង​ប្អូន​ខ្ញុំ។ ខ្ញុំ​សូម​បួងសួង​ឲ្យ​គាត់​ជាប់​ជា​ស្រី​ឆ្នើម CNN»
ចំណែក​កុមារី សុខ សូម៉ាលី អាយុ​១៦​ឆ្នាំ អះអាង​ថា ទើប​រៀន​ថ្នាក់​ទី​៣ នៅ​សាលា​របស់​អង្គការ PIO និង​រៀន​ជំនាញ​កែ​សម្ជស្ស។ សុខ សូម៉ាលី ឲ្យ​ដឹង​ថា គេ​មក​ពី​ស្រុក​ក្រគរ ខេត្ត​ពោធិ៍សាត់។ ម្តាយ​ស្លាប់​ដោយសារ​ជំងឺ​ទាច​ទឹក បន្សល់​កូនៗ ១០​នាក់​ឲ្យ​ឪពុក​ថែ​ទាំ។ គេ​មក​រស់​នៅ​ភ្នំពេញ យក​គំនរ​សំរាម​ជា​ផ្ទះ។ ក្រោយ​មក​អង្គការPIO បាន​ជួយ​ពួក​គេ​ឲ្យ​បាន​រៀន មាន​អាហារ​ហូប​និង​មាន​កន្លែង​ស្នាក់នៅ។
នាយិកា​ប្រតិបត្តិ​នៃ​អង្គការ​លើក​ស្ទួយ​ប្រជាពលរដ្ឋ PIO លោកស្រី នួន ភីមាន បាន​ឲ្យ​ដឹង​ថា អង្គការ​នេះ​មាន​ទីតាំង​៣​កន្លែង នៅ​ក្នុង​ក្រុង​ភ្នំពេញ។ អង្គការ PIO បាន​ផ្តល់​កន្លែង​ស្នាក់នៅ​ដល់​កុមារ​កំព្រា​ចំនួន​៣០​នាក់។
លោកស្រី នួន ភីមាន នឹង​ត្រូវ​ធ្វើ​ដំណើរ​ទៅ​សហរដ្ឋ​អាមេរិក​ពេល​ឆាប់ៗ​នេះ ដើម្បី​ទទួល​រង្វាន់​និង​ពាន​រង្វាន់​ជា​វីរ​នារី​ឆ្នើម​ប្រចាំ​ទូរទស្សន៍ CNN អាមេរិក ឆ្នាំ​២០០៨ ដែល​ប្រារព្ធ​ធ្វើ​នៅ​ហូលីវូដ​ទីក្រុង Los Angeles ហើយ​ការ​ប្រកាស​លទ្ធផល​ជ្រើសរើស​ក្នុង​ចំណោម ១០​នាក់ ក្លាយ​ជា​វីរជន​ឆ្នើម​ម្នាក់​សម្រាប់​ទូរទស្សន៍ CNN អាមេរិក​ឆ្នាំ​២០០៨ នឹង​ប្រព្រឹត្ត​ទៅ​នៅ​ថ្ងៃ​២៧ ខែ​វិច្ឆិកា ខាង​មុខ។
លោកស្រី នួន ភីមាន មាន​ប្រសាសន៍​ថា ៖ «ប្រទេស​ខ្មែរ​តូច គេ​មិន​សូវ​ស្គាល់ ហើយ​ក្នុង​ចំណោម​ទាំង​អស់ ដូច​ប្រទេស​ផ្សេងៗ ដូច​ចិន ដូច​ថៃ លើ​ពិភពលោក ប៉ុន្តែ​ហេតុអី​បាន​ខ្មែរ​យើង​ជាប់? អ៊ីចឹង ៩​នាក់ សុទ្ធតែ​អ្នក​នៅ​អាមេរិក​ទេ តែ​គេ​ចេញ​ទៅ​ជួយ​នៅ​ប្រទេស​ផ្សេងៗ...។ ហើយ​យើង​ខ្មែរ ស្រ្តី​ខ្មែរ ហើយ​យើង​ជាតិ​ខ្មែរ យើង​ជួយ​កូន​ខ្មែរ»


ប្រជារាស្រ្តខ្មែរ ស្លៀកពាក់ស ចូលរួមមរណទុក្ខ នៅមុខព្រះ បរមរាជវាំង

ភ្នំពេញ ៖ នៅរសៀលថ្ងៃទី១៥ ខែតុលា ឆ្នាំ២០១២ ប្រជារាស្រ្តរបស់ សម្តេចឪ រួមមាន តាជី យាយជី ជាង១០០នាក់ បានស្លៀកពាក់ សំលៀកបំពាក់ ពណ៌ស អង្គុយសូត្រធម៌ ឧទ្ទិសកុសល ថ្វាយដល់ ព្រះវិញ្ញាណក្ខន្ធ ចំពោះសម្តេចឪ សម្តេចតា សម្តេចតាទួតនៃយើង ដែលបានសោយ ទីវង្គត់ នៅទីក្រុង ប៉េកាំង ប្រទេសចិន។
ប្រជារាស្រ្ត របស់ព្រះអង្គ បាននាំគ្នាសូត្រ និងអង្គុយស្មឹងស្មាធ នៅខាងមុខ ព្រះបរមរាជវាំង អមដោយទឹក មុខ និងទុក្ខ ក្រៀមក្រំយ៉ាងធំធេង ជាទីបំផុត ដែលប្រទេសកម្ពុជា បានបាត់បង់នូវ អតីតព្រះ មហាក្សត្រ សម្តេចឪ សម្តេចតា សម្តេចតាទួត ។
ព្រះបរមសព របស់ព្រះអង្គ និងដង្ហែតាមព្រះទីនាំង ពិសេស មកដល់ព្រះរាជា ណាចក្រកម្ពុជា នៅវេលាម៉ោង៣ រសៀលថ្ងៃទី១៧ ខែតុលា ឆ្នាំ២០១២៕
www.dap-news.com
www.dap-news.com

អាជា្ញធរទួលគោក ពង្រឹងសន្តិសុខ ដើម្បីកាត់បន្ថយ បទល្មើស និងបំបាត់ភាព អនាធិបតេយ្យ

Photo by DAP-NEWS
ភ្នំពេញ៖ ដើម្បីបង្ការ និងទប់ស្កាត់ រាល់សកម្មភាព បទល្មើស ដែលកើតឡើង ជាយថាហេតុ អាជា្ញធរខណ្ឌ ទួលគោក បានដឹកនាំកម្លាំង សមត្ថកិច្ចចុះ ប្រតិបត្តិការ ឆែកឆេរអាវុធជាតិ ផ្ទុះនិង ប្រមូលស្រ្តីរកស៊ីផ្លូវភេទ កាលពីយប់ថ្ងៃទី០២ ខែសីហា ឆ្នាំ២០១២ គោលបំណង បំបាត់ភាព អនា ធិបតេយ្យប៉ះ ពាល់សណ្តាប់ធ្នាប់ សាធារណៈនិង រឿងអសន្តិសុខសង្គម ។
អភិបាលរង ខណ្ឌទួលគោកលោក សាំង សុភះវិចិត្រ បាននិយាយថា រឿងសន្តិសុខសង្គម ជារឿងសំខាន់ ដែលយើងគ្រប់គ្នាត្រូវយក ចិត្តទុកដាក់ ។ តែដោយឡែករឿងសណ្តាប់ធ្នាប់ក៍ដូចគ្នាផងដែរ ។
 លោកភិបាលរងរូបនេះ បានបញ្ជាក់ថា បន្ទាប់ពីមានភាព អនាធិបតេយ្យ កើតឡើង ដោយសារ ស្រ្តីរកស៊ីផ្លូវភេទ ឈរត្រៀបត្រា បោយដៃហៅភ្ញៀវ តាមដងផ្លូវ សាធារណៈហើយនោះ អាជា្ញធរ ទួលគោក ក៍ចាត់វិធានការ ប្រមូលពួកគាត់ ដើម្បីបញ្ជូនទៅមន្ទីរ សង្គមកិច្ច រាជធានីភ្នំពេញ គោល បំណងចង់កាត់បន្ថយ ការគ្មានសណ្តាប់ធ្នាប់ ។
គោលដៅចំនួន៥ ត្រូវបានអាជា្ញធរ ចុះប្រមូលស្រ្តីរកស៊ីផ្លូវភេទ ក្រោយពីយុទ្ធនាការ ឆែកឆេរអាវុធ ជាតិផ្ទុះ បានធ្វើឡើងមុនរយះពេលកន្លះម៉ោង កាលពីយប់ថ្ងៃទី២ ខែសីហា ឆ្នាំ២០១២ ។
ពាក់ព័ន្ធនឹងការត្រួតពិនិត្យ អាវុធជាតិផ្ទុះពេលយប់នេះផង ដែរតាមបណ្តាខណ្ឌផ្សេងទៀត នៅក្នុងរាជធានីភ្នំពេញ គេក៍សង្កេតឃើញថា មានយុទ្ធនាការដូចគ្នា ក្រោយពីអភិបាល រាជធានី ភ្នំពេញ លោកកែប ជុតិមា បានដាក់ផែនការឲ្យពង្រឹង សន្តិសុខហើយនោះ ៕
Photo by DAP-NEWS
Photo by DAP-NEWS
Photo by DAP-NEWS