ជនទំនើងដែលមានចរិតឃោរឃៅគប់ក្បាលស្ត្រីទន់ខ្សោយនឹងកែវស្រា បៀរនោះឈ្មោះតេង វិចិត្រ អាយុជាង៣០ឆ្នាំ ជាអ្នកបើកបររថយន្តឱ្យឧកញ៉ាម្នាក់ មានស្រុកកំណើតភូមិផ្សារលើ ឃុំស្គុះ ស្រុកសំរោងទង ខេត្តកំពង់ស្ពឺ សព្វថ្ងៃស្នាក់នៅសង្កាត់មិត្តភាព ខណ្ឌ ៧មករា រាជធានីភ្នំពេញ។ ជននេះត្រូវប៉ូលិសប៉ុស្តិ៍កាកាប និងម្ចាស់ហាងសហការគ្នាចាប់ខ្លួនបញ្ជូនទៅកាន់ផ្នែកព្រហ្ម ទណ្ឌខណ្ឌដង្កោ ចំណែកឯស្ត្រីលក់ស្រាបៀររងគ្រោះឈ្មោះលីដា អាយុ១៨ឆ្នាំ ជាស្ត្រីបំរើស្រាបៀរថៃហ្គ័រ ប្រចាំនៅក្នុងភោជនីយដ្ឋាន «ថ្ងៃនេះថ្ងៃជ័យ» នោះ ។ នាងមានទីលំនៅក្នុងភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ សព្វថ្ងៃស្នាក់នៅផ្ទះជួលក្នុងភូមិកើតហេតុដោយរងរបួសដេរ៦ ថ្នេរ ហើយពេលនេះនាងកំពុងសម្រាកព្យាបាលរបួសនៅក្នុងមន្ទីរពហុព្យា បាល និងសម្ភពឡាំប៊ុនថន។ តាមប្រភពព័ត៌មានបានឱ្យដឹងថា នៅមុនពេលកើតហេតុជនអគតិរូបនេះមានគ្នា៤នាក់ ជិះរថយន្តម៉ាកតូយ៉ូតា ស៊ើបមួយគ្រឿង ទៅផឹកស៊ីនៅក្នុងភោជនីយដ្ឋានខាងលើ ដោយផឹកស្រាបៀរ ABC ។ នៅពេលផឹកស៊ីនោះ ក្រុមជនខាងលើបាននិយាយឡូឡាខ្លាំងៗធ្វើឫកពាសម្បើមខ្លាំងណាស់ ហាក់គ្មានសុជីវធម៌ក្នុងខ្លួនបន្តិចណាឡើយ ។ ប្រភពដដែលបានបន្តទៀតថា ពេលនោះស្ត្រីរងគ្រោះ គឺជាអ្នកចាក់ស្រាឱ្យ ហើយជនដៃដល់បានហុចស្រាបៀរ ABC ពេញ១កែវឱ្យនាងផឹក ពេលនោះនាងប្រកែកថា មិនស្រួលខ្លួនអត់ហ៊ានផឹកទេ ។ ប៉ុន្តែដោយសារជននោះបង្ខំខ្លាំងពេក នាងក៏យល់ព្រមផឹកទាំងបង្ខំចិត្តអស់កន្លះកែវ នៅសល់កន្លះកែវទៀតនាងទុកនៅលើតុវិញ ។ ប្រភពដដែលបានបន្តទៀតថា ក្នុងខណៈនោះជនខាងលើបានបង្ខំនាងផឹកឱ្យអស់ ប៉ុន្តែនាងមិនផឹកធ្វើឱ្យជននោះខឹងក៏បានស្រែកឡូឡាថា នាងមើលងាយខ្លួនរួចក៏ទាញកែវមកដាក់ទឹកកក ព្រមទាំងចាក់ស្រាបៀរថែមពេញ១កែវ យកមកគប់ក្បាលស្ត្រីរងគ្រោះបណ្តាលឱ្យបែករយះចេញឈាម និងដួលសន្លប់បាត់ស្មារតី។ ភ្លាមនោះជនអគតិនេះប្រុងរត់គេចខ្លួន ប៉ុន្តែត្រូវម្ចាស់ហាងឃាត់ និងទូរស័ព្ទប្តឹងប៉ូលិសឱ្យមកចាប់ខ្លួនតែម្តង ។ ដោយឡែកស្ត្រីជាម្តាយស្ត្រីរងគ្រោះបាននិយាយថា កូនរបស់គាត់អត់មានទំនាស់ជាមួយជនទាំងនោះទេ គឺពួកគេមានទំនាស់ជាមួយម្ចាស់ហាង ហើយទាញកែវគប់ម្ចាស់ហាងខុសក៏ប្លាតទៅត្រូវក្បាលកូនស្រី របស់គាត់តែម្តង ៕
No comments:
Post a Comment