ដោយ សុខ សេរី
2011-03-08
ស្ត្រីទណ្ឌិតជាច្រើនរយនាក់ នៅក្នុងពន្ធនាគារព្រៃសក៏ប្រារព្ធទិវានារីអន្តរជាតិដែរ។ទណ្ឌិតជាស្ត្រីភេទចំនួន ៤៥៨នាក់ និងកុមារទៅរស់នៅតាមម្ដាយជាប់ពន្ធនាគារចំនួន ១០នាក់ នៅថ្ងៃទី៨ ខែមីនា ឆ្នាំ២០១១ បាននាំគ្នាប្រារព្ធទិវានារីអន្តរជាតិ លើកទី១០០ នៅក្នុងគុកព្រៃស ឬហៅថាមជ្ឈមណ្ឌលអប់រំកែប្រែ (ម២) ដោយមានកម្មវិធីសំដែងរបាំគោះត្រឡោក ច្រៀងលេងកម្សាន្ត និងចែកអំណោយក្នុងបរិយាកាសសប្បាយរីករាយ។
នៅក្នុងពិធីនោះ អាជ្ញាធរគ្រប់គ្រងគុកព្រៃស បានហាមឃាត់មិនឲ្យអ្នកកាសែតថតយករូបភាពអ្នកទោស ដើម្បីផ្សព្វផ្សាយទេ ប៉ុន្តែបានអនុញ្ញាតឲ្យសម្ភាស និងចូលយកព័ត៌មាននៅក្នុងពិធីនេះជាធម្មតា។
ប្រធានអង្គការសិទ្ធិមនុស្សលីកាដូ (Licahdo) លោកស្រី ពុង ឈីវកេក ដែលបានដឹកនាំយកអំណោយទៅចែកជូនទណ្ឌិតជាស្ត្រីភេទទាំងនោះ បានមានប្រសាសន៍ថា សូមឲ្យស្ត្រីនៅទីនេះកុំឲ្យមានប្រព្រឹត្តិទោសកំហុសនៅថ្ងៃក្រោយ ទៀត ៖ "បានន័យថា បងប្អូនមកកន្លែងហ្នឹង អត់មានសិទ្ធិទទួលទារុណកម្មទេ។ អត់មាននរណាធ្វើបាបបងប្អូនអ៊ីចឹងទេ។ បងប្អូនត្រូវតែមានម្ហូបអាហារទទួលទាន បងប្អូនឈឺមានពេទ្យមកមើល អត់មានការធ្វើបាបទេ។ ហើយបងប្អូនត្រូវគិតថា ចូលមកកន្លែងនេះ យើងត្រូវគិតមើលពិចារណា យើងធ្វើខុសមែន យើងរៀនសូត្រឡើងវិញ យើងខំកែខ្លួនយើង ចេញទៅវិញ យើងចូលបម្រើសង្គមយើងវិញ"។
ប្រធានគ្រប់គ្រងគុកព្រៃស ផ្នែក ម២ លោក ក្លូត ដារ៉ា ដែលបានចូលរួមធ្វើជាអធិបតីនៅក្នុងពិធីនេះ បានមានប្រសាសន៍ប្រាប់វិទ្យុអាស៊ីសេរីថា ស្ថានការណ៍រស់នៅរបស់អ្នកទោសបច្ចុប្បន្ន មានសភាពចង្អៀតណែន គឺបន្ទុកមួយមានអ្នកទោសរវាង ៣០នាក់ ទៅ៥០នាក់។ លោកបន្តថា ៖ "រៀបចំ ពេលនៅតាមអាគារមួយៗហ្នឹង យើងចែកឲ្យគាត់ចេញ ដើម្បីឲ្យគាត់មានសុខភាពស្រួល។ បច្ចុប្បន្ននេះ យើងមានផ្ទុកចំនួន ៥០នាក់ ឬ៣០នាក់ ប៉ុន្តែអាគារវែងៗ។ អាគារមានចាស់ៗហ្នឹង មណ្ឌលខ្ញុំកំពុងតែរៀបចំកែដើម្បីកាត់បន្ថយឲ្យគាត់ទូលាយ"។
លោកបានឲ្យដឹងថា បច្ចុប្បន្ននេះ មានអង្គការដៃគូរចំនួន១៣ តែងតែជួយសម្ភារផ្សេងៗ និងការបណ្ដុះបណ្ដាលវិជ្ជាជីវៈដល់អ្នកទោសទាំងនោះ។
ទណ្ឌិតឈ្មោះ នី ពៅ អាយុ៤២ឆ្នាំ នៅស្រុកកោះធំ ខេត្តកណ្ដាល ដែលត្រូវបានតុលាការក្រុងភ្នំពេញ កាត់ទោសឲ្យជាប់គុក ១០ឆ្នាំ ក្រោមបទជួញដូរគ្រឿងញៀន តាំងពីឆ្នាំ២០០៣ មក បានថ្លែងថា ៖ "ចង់ ឲ្យរួចឆាប់បានចេញ ហើយខ្ញុំមានផ្ទុកមេរោគអេដស៍ទៀត។ សុំឲ្យផ្ដល់អ្វីហូបផង។ អត់មានម៉ែឪ អត់មានបងប្អូនទាំងអស់"។
សេចក្ដីប្រកាសព័ត៌មានរបស់អង្គការសិទ្ធិមនុស្សលីកាដូ ចេញផ្សាយនៅថ្ងៃទី៨ ខែមីនា ឆ្នាំ២០១១ បាននិយាយថា ប្រព័ន្ធគ្រប់គ្រងពន្ធនាគារនៅក្នុងប្រទេសកម្ពុជា មិនមានលទ្ធភាពគ្រប់គ្រាន់ទេ ដើម្បីផ្ដល់តាមសេចក្ដីត្រូវការចំពោះស្ត្រីជាម្ដាយ និងកូន នៅក្នុងពន្ធនាគារ ដូចជាថ្នាំព្យាបាលសុខភាព របបអាហារមានជីវជាតិ និងទឹកស្អាតប្រើប្រាស់ជាដើម៕
No comments:
Post a Comment