រូបថតថ្ងៃទី៨ មីនា ២០១១៖ លោក ភីល រ៉ូប៊ើតសាន់
(Phil Robertson) នាយករងប្រចាំតំបន់អាស៊ីរបស់
ដោយ កែវ និមល
2011-03-08
នៅកម្ពុជាមានរៀបចំពិធីជួបជុំអបអរទិវានារី ៨ មីនា តែការអនុញ្ញាតនៅមានភាពលំអៀង ដោយសមាគម និងអង្គការខ្លះគេមិនអនុញ្ញាតឲ្យរៀបចំនៅកន្លែងស្នើសុំទេ។អង្គការឃ្លាំមើលការរំលោភសិទ្ធិមនុស្សអន្តរជាតិមួយឈ្មោះ យូមិនរ៉ៃវ៉ាត់ (Human Right Watch) បានចេញសេចក្ដីថ្លែងការណ៍មួយ នៅថ្ងៃទី៨ មីនា រិះគន់រដ្ឋាភិបាលកម្ពុជា ដែលបានបដិសេធមិនឲ្យអង្គការមិនមែនរដ្ឋាភិបាលមួយ ឈ្មោះអង្គការចលនាស្ត្រីកម្ពុជា (CWMO) រៀបចំការជួបជុំសមាជិកប្រមាណ ២០០០នាក់ នៅមុខវត្តបទុមវតីដើម្បីអបអរខួបលើកទី១០០ ទិវានារីអន្តរជាតិ ៨មីនា។
លោក ភីល រ៉ូប៊ើតសាន់ (Phil Robertson) នាយករងប្រចាំតំបន់អាស៊ីរបស់ យូមិនរ៉ៃវ៉ាត់ (Human Rights Watch) បានមានប្រសាសន៍ថា ៖ "អង្គការ Human Right Watch មានការព្រួយបារម្ភថា ចំពោះការចុះថយការគោរពសិទ្ធិមនុស្សនៅកម្ពុជា។ ថ្ងៃនេះ យើងបានឃើញសេរីភាពនៃការជួបជុំគ្នាថិតនៅក្រោមការគំរាមកំហែង គឺការមិនអនុញ្ញាតឲ្យមានការជួបជុំដើម្បីអបអរទិវានារីអន្តរជាតិ នៅក្បែរវិមានឯករាជ្យ ដែលបានដាក់តាំងដោយក្រសួងរបស់រដ្ឋាភិបាល។ រដ្ឋាភិបាលបានរំលោភលើស្មារតីទិវានារី ៨ មីនា ដោយមិនឲ្យមានការជួបជុំ ដែលគ្រោងធ្វើឡើងនៅក្បែរអតីតសាលប្រជុំរដ្ឋសភា។ ការជួបជុំនោះគ្រោងមានរដ្ឋមន្ត្រីក្រសួងកិច្ចការនារីចូលរួមផង ដែរ តែគាត់បានបដិសេធមិនចូលរួមវិញ ក្រោយពេលសាលារាជធានីមិនអនុញ្ញាតឲ្យជួបជុំនៅទីនោះ។ ហើយការបដិសេធនោះ មិនបានប្រាប់ហេតុផលទៀតផង"។
លោក ភីល រ៉ូប៊ើតសាន់ បានអំពាវនាវដល់សហគមន៍អន្តរជាតិ និងប្រទេសផ្ដល់ជំនួយដល់កម្ពុជា ឲ្យពិនិត្យមើល និងជួយធ្វើយ៉ាងណាជំរុញឲ្យរដ្ឋាភិបាលកម្ពុជាគោរពសិទ្ធិស្រប ច្បាប់របស់ប្រជាពលរដ្ឋកម្ពុជា។
សេចក្ដីថ្លែងការណ៍របស់ យូមិនរ៉ៃវ៉ាត់ (Human Rights Watch) បានលើកឡើងថា សាលារាជធានីភ្នំពេញ មិនបានបញ្ជាក់ហេតុផលចំពោះការបដិសេធមិនឲ្យអង្គការចលនាស្ត្រី កម្ពុជា (CWMO) រៀបចំការជួបជុំស្ត្រីកម្ពុជា ប្រមាណ ២០០០នាក់ នៅទីធ្លាមុខវត្តបទុមវតីនោះឡើយ។ ហើយការបដិសេធនោះ បានជូនដំណឹងនៅល្ងាចថ្ងៃទី៧ មីនា ក្រោយពេលអង្គការចលនាស្ត្រីកម្ពុជា (CWMO) បានស្នើសុំ និងបានរៀបចំជាយូរមកហើយ។
លោក ប៊្រែត អាដាម (Brad Adams) ដែលនាយកផ្នែកអាស៊ីរបស់ យូមិនរ៉ៃវ៉ាត់ (Human Rights Watch) បានមានប្រសាសន៍ថា ការបដិសេធរបស់រដ្ឋាភិបាលកម្ពុជានោះ ហាក់ដូចជារឿងកំប្លែងមួយ ហើយការហាមប្រាមរបស់រដ្ឋាភិបាលទាក់ទងគោលការណ៍គ្រឹះនៃសិទ្ធិ មនុស្ស មិនមានអ្វីជាការចម្លែកឡើយ។
លោកស្រី មាស មរកត ប្រធានអង្គការចលនាស្ត្រីកម្ពុជា (CWMO) ដែលជាអ្នករៀបចំគម្រោងការជួបជុំរបស់ស្ត្រីជិត ២០០០នាក់ នៅមុខវត្តបទុមវតី ក្បែរអតីតសាលប្រជុំរដ្ឋសភា បានមានប្រសាសន៍ឲ្យដឹងថា លោកស្រីបានដាក់លិខិតស្នើសុំរៀបចំការជួបជុំស្ត្រី មកពីអង្គការមិនមែនរដ្ឋាភិបាល រោងចក្រ សហគ្រាសនានា។ លិខិតនោះបានដាក់ស្នើសុំសាលារាជធានីតាំងពីដើមខែកុម្ភៈមក ម្ល៉េះ ហើយមានការតាមដានលិខិតនោះ ដើម្បីរង់ចាំការអនុញ្ញាតជាបន្តបន្ទាប់ រហូតដល់មានជូនដំណឹងទៅសាលារាជធានីថា ការជួបជុំនោះមានរដ្ឋមន្ត្រីក្រសួងកិច្ចការនារីចូលរួមថ្លែង សុន្ទរកថាទៀតផង ៖ "ប៉ុន្តែយើងបានទទួលព័ត៌មានមុននេះ គឺសាលារាជធានីភ្នំពេញមិនបានផ្ដល់កន្លែងនៅមុខវត្តបទុមវតីនេះឲ្យ ក្រុមយើងខ្ញុំទាំងអស់គ្នា ដែលមកពីអង្គការសមាគម សហព័ន្ធសហជីព ដើម្បីរៀបចំទេ"។
លោកស្រី មាស មរកត បានមានប្រសាសន៍ទៀតថា ទោះបីជាសាលារាជធានីមិនអនុញ្ញាតឲ្យរៀបចំការជួបជុំនៅមុខ វត្តបទុមវតីក្ដី តែនៅថ្ងៃទី៨ មីនានេះ ក្រុមអង្គការលោកស្រីបានរៀបចំការជួបជុំគ្នានៅជាយក្រុងភ្នំពេញ វិញ គឺនៅទីស្នាក់ការអង្គការសុវណ្ណកុមារ នៅច្បារអំពៅវិញ ៖ "ជួប ជុំគ្នានៅទីនោះ យើងមានការសហការជាមួយអាជ្ញាធរមូលដ្ឋាន ហើយថ្ងៃនេះដែរ យើងមានការផ្ដល់កិត្តិយសដោយលោកស្រីចៅសង្កាត់។ ចៅសង្កាត់មានជ័យនេះ គាត់អញ្ជើញចូលរួមជាអធិបតី"។
ចំពោះសំណួរថាហេតុអ្វីមិនមានការរៀបចំនៅទីលានសេរីភាពនៅ ទីក្រុងភ្នំពេញ លោកស្រី មាស មរកត បានមានប្រសាសន៍ថា ដោយពេលវេលាខ្លីមិនអនុគ្រោះក្នុងការដាក់លិខិតសុំធ្វើនៅទីលាន សេរីភាពនោះ និងដោយចំនួនអ្នកចូលរួមធ្វើមីទីង នៅទីលានសេរីភាពមានការកំណត់នោះ ទើបលោកស្រីបានរៀបចំទៅធ្វើនៅជាយក្រុងភ្នំពេញវិញ ៖ "ចំពោះការ មិនអនុញ្ញាត មិនផ្ដល់កន្លែងរបស់សាលារាជធានីនេះ យើងក៏មិនមានទស្សនៈអី ថាខឹងសម្បារអីដែរ។ នោះជាសិទ្ធិសេរីភាពក្នុងការផ្ដល់ជូន និងមិនផ្ដល់ជូនរបស់សាលារាជធានីភ្នំពេញ។ យើងខ្ញុំយល់ថា ប្រហែលជាគាត់មិនទាន់បានយល់ និងបានស្គាល់អំពីយើងខ្ញុំណា"។
លោក កែប ជុតិមា អភិបាលក្រុងភ្នំពេញមិនអាចទាក់ទងសុំការពន្យល់លើការមិនអនុញ្ញាត ឲ្យមានការជួបជុំគ្នានោះ និងបកស្រាយចំពោះការលើកឡើងក្នុងសេចក្ដីថ្លែងការណ៍របស់ យូមិនរ៉ៃវ៉ាត់ (Human Rights Watch) ឡើយ។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រីបានមានប្រសាសន៍ថា ការមិនអនុញ្ញាតរបស់សាលារាជធានីមានហេតុផលរបស់គេ ពីព្រោះកាលណាមានការជួបជុំមនុស្សណាមួយ ដែលមានចំនួនច្រើន ត្រូវមានការការពារសន្តិសុខ ត្រូវចៀសវាងការស្ទះចរាចរជាដើម។
លោកស្រី ពុង ឈីវហ្គិច ប្រធានអង្គការឃ្លាំមើលការគោរពសិទ្ធិមនុស្សមួយឈ្មោះលីកាដូ បានមានប្រសាសន៍ថា លោកស្រីមានការសោកស្ដាយចំពោះការមិនអនុគ្រោះរបស់សាលារាជធានី ដែលមិនឲ្យមានការជួបជុំគ្នានោះ ពីព្រោះការជួបជុំនោះ មិនមែនជាបាតុកម្មទាមទារអ្វីមួយនោះឡើយ គ្រាន់តែជាការជួបជុំគ្នាដើម្បីរំលឹកខួបនារីប៉ុណ្ណោះ។
អង្គការចលនាស្ត្រីកម្ពុជា (CWMO) ជាអង្គការមិនមែនរដ្ឋាភិបាលរបស់ស្ត្រីជាពលករ បង្កើតឡើងនៅឆ្នាំ២០០៦ ដោយមានការចូលរួមរបស់ស្ត្រីមកពីវិស័យកាត់ដេរ សណ្ឋាគារ សំណង់ មកពីសហព័ន្ធសហជីពចំនួន៦។ វែបសាយរបស់អង្គការនេះបានប្រកាសថា សមាជិកអង្គការចលនាស្ត្រីកម្ពុជា (CWMO) រួមមានចំនួនប្រមាណ ១៥ម៉ឺននាក់៕
No comments:
Post a Comment