នៅក្នុងកិច្ចពិភាក្សាដែលចំណាយអស់រយៈពេល ៤ ម៉ោង នោះ អ្នកចូលរួមបានរកឃើញបញ្ហាបីដ៏ចម្បងទាក់ទិននឹងការរំលោភបំពានលើ ស្ត្រី ដែលក្នុងនោះរួមមាន ការរំលោភសេពសន្ថវៈ ដែលសូម្បីតែឪពុកក៏ចាប់រំលោកកូនបង្កើតរបស់ខ្លួនដែរ; ហិង្សាក្នុងគ្រួសារ; និងការជួញដូរទាំងនៅក្នុងប្រទេស និងឆ្លងដែន។
បញ្ហាមួយចំនួនទៀតក៏ត្រូវបានកិច្ចប្រជុំកំណត់ថាជាអំពើហិង្សា និងជាហេតុនាំឲ្យមានអំពើនេះដែរ ដែលក្នុងនោះមានការជះទឹកអាស៊ីដ; ការប្រើកម្លាំងកុមារីតាមផ្ទះ និងសហគ្រាសនានា; ការរំលោភលើស្ត្រីបម្រើសេវាកម្សាន្ត; ការដោះស្រាយបញ្ហាក្រៅប្រព័ន្ធតុលាការ; ការចូលរួមរបស់បុរសនៅមានកម្រិតនៅតាមសហគមន៍; ព័ត៌មានមិនបានដល់សហគមន៍; និងការយល់ដឹងរបស់ប្រជាពលរដ្ឋនៅមានកម្រិត។
បន្ទាប់ពីបានរកឃើញនូវការប្រឈមទាំងនេះរួចមក អ្នកចូលរួមក៏បានរកឃើញយុទ្ធសាស្ត្រមួយចំនួន ដើម្បីដោះស្រាយ បញ្ហា ដោយរួមមាន ៖
- បង្កើនការផ្សព្វផ្សាយដោយផ្ទាល់ដល់សហគមន៍ និងការផ្សព្វផ្សាយដោយប្រយោលតាមបណ្ដាញសារព័ត៌មាន។
- បណ្ដុះបណ្ដាលពីចំណេះដឹងច្បាប់ និងវិធានផ្សេងៗទាក់ទិនទៅនឹងហិង្សាលើស្ត្រីដល់ប្រជាពលរដ្ឋទាំង ស្ត្រី និងបុរស ដល់អាជ្ញាធរមូលដ្ឋាន សមាជិកក្រុមប្រឹក្សាឃុំ-សង្កាត់ និងកងកម្លាំងនគរបាល។
- ប្រើប្រាស់ប្រព័ន្ធបច្ចេកវិទ្យា គមនាគមន៍ ព័ត៌មានវិទ្យា (ICT) ដូចជាប្រព័ន្ធទូរស័ព្ទ អ៊ីមែល ការបង្កើតបញ្ជីអ៊ីមែលរួមដើម្បីបញ្ជូនសារឲ្យគ្នាទៅវិញទៅមក និងការបង្កើតប្រព័ន្ធទូរស័ព្ទហត់ឡាញដើម្បីផ្ដល់ព័ត៌មានឲ្យទាន់ ពេលវេលា។
- បង្កើតបណ្ដាញដើម្បីធ្វើឲ្យព័ត៌មានបានទៅដល់គោលដៅដោយផ្ទាល់។
- សង្គមស៊ីវិលត្រូវធ្វើការរួមគ្នាយ៉ាងជិតស្និតលើការងារស្ត្រី ដោយមានការសហការជាមួយស្ថាប័នរាជរដ្ឋាភិបាល។
- ដោយសង្គមស៊ីវិលមានបទពិសោធន៍ច្រើននៅតាមសហគមន៍លើការងារហិង្សា លើ ស្ត្រី សង្គមស៊ីវិលត្រូវចែករំលែកបទពិសោធន៍ទាំងនោះដល់ក្រសួងកិច្ចការនារី ដែលនៅចន្លោះប្រហោង ដោយសារការខ្វះថវិកា និងធនធានមនុស្សសម្រាប់ប្រតិបត្តិការ។
- បណ្ដុះបណ្ដាលដល់សង្គមស៊ីវិលពីសារសំខាន់នៃការសិក្សាផ្នែក ICT និងជំរុញឲ្យប្រព័ន្ធ ICT មានតម្លៃទាប។
- រៀបចំពិគ្រោះយោបល់ដាច់ដោយឡែករវាងស្ត្រីជាមួយសមាជិក ក្រុមប្រឹក្សា ឃុំ-សង្កាត់ និងនគរបាល និង ការពិគ្រោះយោបល់រវាងបុរសជាមួយសមាជិកក្រុមប្រឹក្សាឃុំ-សង្កាត់ និងនគរបាល។ ការភ្ជាប់ទំនាក់ទំនងរវាងស្ថាប័នសិក្សា និងអង្គភាពប្រតិបត្តិនានាលើការងារ ICT ដើម្បីឲ្យស្របតាមគោលនយោបាយ ICT។
- រៀបចំការកំណត់ឲ្យបានច្បាស់លាស់ថាតើអង្គការណាធ្វើអ្វី និងធ្វើនៅទីណា ដើម្បីចៀសវាងការធ្វើការងារជាន់គ្នា។
លោកជំទាវក៏បានទទួលស្គាល់ផងដែរពីប្រសិទ្ធភាពខ្ពស់នៃការ ប្រើប្រាស់ប្រព័ន្ធបច្ចេកវិទ្យា គមនាគមន៍ និងព័ត៌មានវិទ្យាសម្រាប់ការទប់ស្កាត់អំពើហិង្សាលើស្ត្រី និងកុមារ ។ លោកជំទាវក៏បានជំរុញ និងលើកទឹកចិត្តឲ្យអង្គការសង្គមស៊ីវិលខិតខំស្វែងរកមូលនិធិ ដើម្បីការងារកាត់បន្ថយអំពើហិង្សាលើស្ត្រី ហើយក្រសួងនឹងគាំទ្រ និងរង់ចាំសហការជានិច្ច។
ឯកឧត្ដម ម៉ូវ ចរិយា អគ្គនាយកនៃក្រសួងប្រៃសណីយ៍ និងទូរគមនាគមន៍ បាននិយាយថា ICT ពិតជាមានសារសំខាន់ក្នុងការជួយទប់ស្កាត់ការរំលោភបំពានផ្សេងៗមកលើ ស្ត្រី ដូចនេះ ការបង្កើនការសិក្សា ហើយបង្កើតការងារធ្វើឲ្យបានច្រើន និងភ្ជាប់ទំនាក់ទំនងរវាងស្ថាប័នសិក្សា និងអង្គភាពប្រតិបត្តិនានា ដើម្បីភ្ជាប់ចំណេះដឹងទៅនឹងការអនុវត្តជាក់ស្ដែង។
មានប្រសាសន៍បិទកម្មវីធីប្រជុំនោះ លោកស្រី ជឹម ម៉ាណាវី នាយិកាប្រតិបត្តិអង្គការវិទ្យាស្ថានបើកទូលាយបាននិយាយថា តាមរយៈបទបង្ហាញ និងការពិភាក្សា «យើងឃើញថា អង្គការរបស់អស់លោក លោកស្រីបាននិងកំពុងធ្វើការងារ និងមានយុទ្ធសាស្ត្រសំខាន់ៗ ជាច្រើនក្នុងការចូលរួមទប់ស្កាត់អំពើហិង្សាលើស្ត្រីនិងកុមារ។ យើងទាំងអស់គ្នាកំពុងធ្វើការលើគម្រោងរួមមួយ ស្ដីពី ការទប់ស្កាត់អំពើហិង្សាលើស្ត្រីនិងកុមារ ដែលក្នុងនោះ បច្ចេកវិទ្យា គមនាគមន៍ ព័ត៌មានវិទ្យាបានដើរតួនាទីយ៉ាងសំខាន់»។
លោកស្រីបានបន្ថែមថា ផែនការសកម្មភាពជាតិស្ដីពីការទប់ស្កាត់អំពើហិង្សាលើស្ត្រីគឺជា ផែនការមួយ«សម្រាប់យើងទាំងអស់គ្នា ធ្វើការរួមគ្នាដើម្បីឆ្ពោះទៅរកគោលដៅអភិវឌ្ឍសហស្សវត្ស២០១៥ គោលដៅ៣ ស្ដីពីសមភាពយេនឌ័រ និងការផ្ដល់អំណាចដល់ស្ត្រី»។
គួរបញ្ជាក់ដែរថា នេះគឺជាជំនួបលើកទី ២ ហើយ ដែលបានផ្ដោតលើប្រធានបទដូចគ្នាគឺ «ការចូលរួមការអនុវត្តផែនការសកម្មភាពជាតិស្ដីពីការទប់ស្កាត់អំពើ ហិង្សាលើស្ត្រី» ដែលមានអ្នកចូលរួមប្រមាណជា ៣០ រូប។ ជំនួបលើកដំបូងគឺបានធ្វើនៅព្រឹកថ្ងៃទី ១៧ កុម្ភៈ កន្លងមកនេះ ដែលមានអ្នកចូលរួមមកពីស្ថាប័នជាង ៤០ ដែលធ្វើការងារអំពីស្ត្រីនិងសិទ្ធិ។
អង្គការចំនួន ១០ ផ្សេងទៀតក៏បានសហការ និងចូលរួមក្នុងកិច្ចប្រជុំនេះដែរនោះរួមមានអង្គការសន្តិភាព និងអភិវឌ្ឍន៍ (PyD); អង្គការក្រុមអ្នកច្បាប់ការពារសិទ្ធិកម្ពុជា (CDP); គណៈកម្មាធិការលុបបំបាត់រាល់ទំរង់នៃការរើសអើងប្រឆាំងនារីភេទ (NGO-CEDAW); អង្គការប្រឆាំងអំពើហិង្សាក្នុងគ្រួសារ (PADV); អង្គការជំនួយផ្នែកច្បាប់នៃកម្ពុជា (LAC); អង្គការកម្ពុជាដើម្បីជួយស្ត្រីមានវិបត្តិ (CWCC); មណ្ឌលព័ត៌មានស្ត្រីកម្ពុជា (WMC); អង្គការបំលាស់ប្តូរជាវិជ្ជមានសម្រាប់កម្ពុជា (PCC); អង្គការសុខភាពផ្លូវចិត្តគ្មានព្រំដែន (PSF); និងសម្ព័ន្ធខ្មែរជំរឿននិងការពារសិទ្ធិមនុស្ស លីកាដូ (LICADHO)៕
ព័ត៌មានបន្ថែមសូមចូលទៅកាន់ http://women.open.org.kh/km/second-consultation-meeting-implementation-nappvw
No comments:
Post a Comment