ដោយ សុខ សេរី
 |
តំណាងរាស្ត្រគណបក្ស សម រង្ស៊ី លោកស្រី មូរ សុខហួរ
ធ្វើសន្និសីទកាសែតនារដ្ឋសភា
នៅថ្ងៃទី៤ ខែមេសា ឆ្នាំ២០១១។
|
2011-04-04
តំណាងរាស្ត្រគណបក្ស សម រង្ស៊ី ស្វែងរកអន្តរាគមន៍ដើម្បីសង្គ្រោះពលការិនីខ្មែរម្នាក់ ដែលរងការធ្វើបាបយ៉ាងធ្ងន់ធ្ងរនៅប្រទេសម៉ាឡេស៊ី។តំណាងរាស្ត្រគណបក្ស សម រង្ស៊ី លោកស្រី មូរ សុខហួរ នៅថ្ងៃច័ន្ទ ទី៤ ខែមេសា ឆ្នាំ២០១១ បានចេញមុខប្ដឹងទៅក្រសួងការងារ និងបណ្ដុះបណ្ដាលវិជ្ជាជីវៈ ក្រសួងការបរទេសកម្ពុជា និងស្ថានទូតប្រទេសម៉ាទ្បេស៊ី នៅក្នុងប្រទេសកម្ពុជា សូមអន្តរាគមន៍ឲ្យបានឆាប់ក្នុងការសង្គ្រោះពលការិនីម្នាក់ដែលបានរងការរំលោភសេពសន្ថវៈ និងធ្វើទារុណកម្មយ៉ាងធ្ងន់ធ្ងរនៅក្នុងប្រទេសម៉ាទ្បេស៊ី នៅពេលថ្មីៗនេះ។ពលការិនីរងគ្រោះនោះ មានឈ្មោះ អ៊ុក សេង អាយុ ២៧ឆ្នាំ នៅក្នុងឃុំធ្លោក ស្រុកស្វាយជ្រំ ខេត្តស្វាយរៀង។ ពលការិនីរូបនេះបានទៅធ្វើការងារជាអ្នកបម្រើនៅក្នុងផ្ទះ នៅប្រទេសម៉ាទ្បេស៊ី កាលពីខែកញ្ញា ឆ្នាំ២០១០ កន្លងមក។ នាងបានទូរស័ព្ទមកប្រាប់ម្តាយថា ម្ចាស់ផ្ទះចាប់រំលោភនាងចំនួន ៣ដង និងបានគំរាមសម្លាប់ បើសិនណានាងទម្លាយរឿងនេះឲ្យអ្នកដទៃបានដឹងឮ។
នាងបានប្រាប់មកម្តាយថា នៅពេលណាម្ចាស់ផ្ទះចោទថា នាងបោសជូតផ្ទះមិនស្អាត គេចាក់សោឃុំក្នុងបន្ទប់ វាយធ្វើបាប និងបង្អត់បាយ។ នាងចង់វិលត្រទ្បប់មកផ្ទះសំបែងវិញឲ្យបានឆាប់។
តំណាងរាស្ត្រគណបក្ស សម រង្ស៊ី លោកស្រី មូរ សុខហួរ បានមានប្រសាសន៍ប្រាប់អ្នកកាសែតនៅក្នុងសន្និសីទកាសែតនៅក្នុងសភាជាតិថា លោកស្រីមិនអាចទទួលយកបានទេចំពោះរឿងនេះ គឺចាំបាច់ត្រូវមានការដោះស្រាយជាបន្ទាន់ ៖ «គឺយើងឃើញថា ស្ថានការណ៍ រឿងស្រ្តីយើងទៅម៉ាទ្បេស៊ីនេះ គឺជាស្ថានការណ៍ដ៏ធ្ងន់ធ្ងរណាស់។ តែផ្ទុយទៅវិញ បើយើងមើលទៅក្រសួងការងារវិញ ឃើញថា ធ្វើការងារនេះដោយរំភើយ»។
ម្ដាយរបស់ពលការិនីរងគ្រោះ គឺលោកស្រី ស្រី សុផល អាយុ ៦៦ឆ្នាំ នៅឃុំធ្លោក ស្រុកស្វាយជ្រំ ខេត្តស្វាយរៀង បានថ្លែងថា លោកស្រីសុំឲ្យរដ្ឋាភិបាលកម្ពុជា និងអាជ្ញាធរពាក់ព័ន្ធជួយសង្គ្រោះកូនស្រីឲ្យបានឆាប់មកប្រទេសកម្ពុជាវិញ ៖ «រំដោះកូនខ្ញុំឲ្យបានមកស្រុកខ្មែរវិញក្នុងពេលឆាប់ៗ ពីព្រោះកូនខ្ញុំភ័យណាស់ យំស្រែកមក។ ខ្លាចថា អ្នកចាប់រំលោភហ្នឹងយកថ្នាំមកឲ្យលេប មិនដឹងជាថ្នាំអ្វី មិនស្គាល់ខ្លាចគេឲ្យលេបថ្នាំញៀន វង្វេងវង្វាន់លែងដឹងអី»។
លោកស្រីបន្តថា លោកស្រីបានរងការគំរាមប្តឹងពីក្រុមហ៊ុននាំពលករឈ្មោះ ចំប៉ា មែន ផៅវើ (Champa Man Power) នៅក្នុងប្រទេសកម្ពុជា បើសិនណារឿងនេះមិនពិត។
វិទ្យុអាស៊ីសេរី មិនទាន់អាចទាក់ទងតំណាងក្រុមហ៊ុន ចំប៉ា មែន ផៅវើ បាននៅទ្បើយទេ ដើម្បីសុំការបំភ្លឺចំពោះការដោះស្រាយរឿងនេះ ដោយសារទូរស័ព្ទបានបិទ ប៉ុន្តែប្រធានសមាគមភ្នាក់ងារជ្រើសរើសពលករកម្ពុជា លោក អ៊ន ប៊ុនហាក់ បានមានប្រសាសន៍ថា បើសិនណារឿងនេះជារឿងពិត ស្ត្រីរងគ្រោះគប្បីប្ដឹងទៅនគរបាលប្រទេសម៉ាទ្បេស៊ី ឬស្ថានទូតកម្ពុជា នៅក្នុងប្រទេសម៉ាទ្បេស៊ី។
លោក អ៊ន ប៊ុនហាក់ មានប្រសាសន៍បន្តថា ៖ «បើសិនជាមានការរំលោភបំពានយ៉ាងនេះ គេលើកទឹកចិត្តឲ្យយើងដាក់ពាក្យបណ្ដឹងទៅគេ ពីព្រោះកន្លងមក យើងឭតែថា មានបញ្ហាចាប់រំលោភបំពាន ប៉ុន្តែយើងមិនដែលមានករណីណាមួយបញ្ជូនទៅគេទេ»។
ប្រភពពីមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា មានពលការិនីកម្ពុជា សរុបជាង ២៥.០០០នាក់នៅក្នុងប្រទេសម៉ាទ្បេស៊ី។
កាលពីដើមខែមីនា ឆ្នាំ២០១១ កន្លងទៅនេះ មន្ត្រីតំណាងក្រសួងការងារ និងបណ្ដុះបណ្ដាលវិជ្ជាជីវៈ មន្ត្រីនគរបាលក្រសួងមហាផ្ទៃ តំណាងក្រុមហ៊ុននាំចេញពលករ និងតំណាងក្រុមអង្គការមិនមែនរដ្ឋាភិបាលបានជួបប្រជុំគ្នាដើម្បីពង្រឹងច្បាប់ និងគោលការណ៍នានា ក្នុងការការពារពលករចំណាកស្រុក និងការពារសិទ្ធិរបស់ពួកគាត់មិនឲ្យរងគ្រោះក្រោមអំពើជួញដូរកម្លាំងពលកម្ម អំពើរត់ពន្ធមនុស្ស និងការកេងប្រវ័ញ្ចផ្លូវភេទជាដើម៕
No comments:
Post a Comment