 |
|
រដ្ឋមន្ត្រីក្រសួងការបរទេសសហរដ្ឋអាមេរិក
លោកស្រី ហ៊ីលឡារី គ្លិនតុន (Hillary Clinton)
ធ្វើសន្និសីទកាសែត
នៅឯក្រសួងការបរទេសក្នុងរាជធានីភ្នំពេញ
នៅថ្ងៃទី១ ខែវិច្ឆិកា ឆ្នាំ២០១០។
|
ដោយ ឡេង ម៉ាលី
2011-04-12
រដ្ឋមន្ត្រីក្រសួងការបរទេសសហរដ្ឋអាមេរិក ជូនពរជនជាតិខ្មែរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ក្នុងសេចក្ដីប្រកាសព័ត៌មានពីទីក្រុងវ៉ាស៊ីនតោន សហរដ្ឋអាមេរិក នៅថ្ងៃទី១១ ខែមេសា លោកស្រី ហ៊ីលឡារី គ្លិនតុន (Hillary R. Clinton) បានផ្ញើសារជូនពរដល់ពលរដ្ឋកម្ពុជាថា ក្នុងនាមលោកប្រធានាធិបតី បារ៉ាក់ អូបាម៉ា (Barack Obama) និងពលរដ្ឋអាមេរិក ខ្ញុំសូមអបអរសាទរចំពោះពលរដ្ឋកម្ពុជា ក្នុងឱកាសប្រារព្ធពិធីបុណ្យចូលឆ្នាំខ្មែរ ដែលនឹងខិតជិតមកដល់នៅប៉ុន្មានថ្ងៃខាងមុខនេះ។ ពិធីបុណ្យចូលឆ្នាំថ្មីនេះ ជាឱកាសមួយដែលពលរដ្ឋខ្មែរត្រូវជួបជុំគ្រួសារ ញាតិមិត្តជិតឆ្ងាយ និងអ្នកជិតខាងតាមវប្បធម៌ប្រពៃណីសម្បូរបែបរបស់ខ្លួន។
នៅក្នុងឱកាសទស្សនកិច្ចរបស់ខ្ញុំនៅប្រទេសកម្ពុជា កាលពីឆ្នាំកន្លងទៅ ខ្ញុំមានការលើកទឹកចិត្តនឹងសុទិដ្ឋិនិយមជាខ្លាំងអំពីអ្នកដឹកនាំ ជំនាន់ក្រោយ និងឱកាសសម្រាប់ប្រទេសយើងទាំងពីរ ដើម្បីពង្រីកទំនាក់ទំនងឱ្យបានកាន់តែជ្រាលជ្រៅថែមទៀត ជាមួយនឹងស្មារតីតស៊ូរបស់ពលរដ្ឋកម្ពុជាគ្រប់រូប។ ប្រទេសយើងទាំងពីរបានធ្វើសហប្រតិបត្តិការជាមួយគ្នាលើបញ្ហាជា ច្រើន ចាប់តាំងពីក្ដីកង្វល់លើបញ្ហាសុខភាពសាធារណៈ រហូតដល់ការពង្រីកសហប្រតិបត្តិការថែរក្សាសន្តិភាពអន្តរជាតិ។ យើងនៅតែប្ដេជ្ញារកមធ្យោបាយថ្មីៗ ថែមទៀត ដើម្បីពង្រឹងភាពជាដៃគូរបស់យើង ដើម្បីផលប្រយោជន៍នៃប្រទេសយើងទាំងពីរ។
ក្នុងឱកាសបុណ្យចូលឆ្នាំថ្មីនេះ ខ្ញុំសូមជម្រាបជូនលោកអ្នកថា សហរដ្ឋអាមេរិកប្ដេជ្ញាចិត្ត និងសូមជូនពរសព្វសាធុការយ៉ាងកក់ក្ដៅ ចំពោះពលរដ្ឋកម្ពុជាគ្រប់រូប សូមឱ្យជួបតែសេចក្ដីសុខ និងសេចក្ដីចម្រើនគ្រប់ប្រការ។ សួស្ដីឆ្នាំថ្មី!
No comments:
Post a Comment