 |
| លោកស្រី មូរ សុខហួរ ផ្ដល់បទសម្ភាសន៍ដល់អ្នកសារព័ត៌មាន នៅតុលាការសាលាឧទ្ធរណ៍ ក្នុងរាជធានីភ្នំពេញការថ្ងៃ២៨-តុលា-២០០៩។ |
ដោយ ម៉ៅ សុធានី
2011-04-13
បទបង្ហាញមួយស្ដីអំពីស្ត្រីនិងការបោះឆ្នោតនៅកម្ពុជា បានរៀបចំធ្វើឡើងកាលពីថ្ងៃទី១២ មេសា នៅទីស្នាក់ការកណ្ដាលរបស់វិទ្យាស្ថានជាតិដើម្បីលទ្ធិប្រជាធិបតេយ្យ (NDI) នៅក្នុងរដ្ឋធានីវ៉ាស៊ីនតោន សហរដ្ឋអាមេរិក។លោកស្រី មូរ សុខហួរ តំណាងរាស្ត្រនៃគណបក្ស សម រង្ស៊ី បានត្រូវអញ្ជើញឲ្យធ្វើជាវាគ្មិនកិត្តិយសដើម្បីផ្ដល់ព័ត៌មាន ស្ដីពីស្ថានភាពរបស់ស្ត្រីខ្មែរ ដែលចូលរួមក្នុងឆាកនយោបាយនៅតាមថ្នាក់មូលដ្ឋាន។ លោកស្រី មូរ សុខហួរ តំណាងរាស្ត្រនៃគណបក្ស សម រង្ស៊ី និងជាអតីតរដ្ឋមន្ត្រីក្រសួងកិច្ចការនារី បានមានប្រសាសន៍ថា ការបង្កើនឲ្យមានចំនួនស្ត្រីជាអ្នកដឹកនាំច្រើននៅតាមថ្នាក់ មូលដ្ឋាន គឺមានសារសំខាន់ណាស់សម្រាប់សង្គមកម្ពុជាបច្ចុប្បន្ន។
នៅក្នុងបទបង្ហាញមួយស្ដីអំពីស្ត្រីនិងការបោះឆ្នោតនៅកម្ពុជា កាលពីថ្ងៃអង្គារ ទី១២ មេសា លោកស្រី មូរ សុខ ហួរ បានមានប្រសាសន៍ថា ការបណ្ដុះផ្នត់គំនិតក្នុងសង្គមមួយដែលឲ្យតម្លៃខ្ពស់ដល់ស្ត្រី និងយុវនារី ការធ្វើឲ្យប្រសើរឡើងនូវស្ថានភាពសិទ្ធិមនុស្ស លទ្ធិប្រជាធិបតេយ្យ ការគោរពច្បាប់ និងអភិបាលកិច្ចល្អ ទង្វើទាំងអស់នេះនឹងផ្ដល់អត្ថប្រយោជន៍ច្រើនដល់សង្គមកម្ពុជា ជាពិសេសគឺនឹងអាចជួយលើកស្ទួយស្ថានភាពលំបាករបស់ស្ត្រីបានប្រសើរ ជាងមុន។
លោកស្រី មូរ សុខហួរ បានមានប្រសាសន៍បញ្ជាក់ពីសេចក្ដីត្រូវការរបស់ស្ត្រីខ្មែរយ៉ាងដូច នេះ ៖ «ដើម្បីធ្វើឲ្យប្រសើរឡើងរបស់ស្ត្រី យើងត្រូវគិតពីសេដ្ឋកិច្ច សុខភាព និងការអប់រំរបស់ស្ត្រី ។ ស្ត្រីនៅកម្ពុជា មិនទាន់ទទួលបាន គឺចំណុចទាំងបីហ្នឹង។ ភាពក្រីក្ររបស់ស្ត្រី ស្ត្រីលក់ដូរបានបន្តិចបន្តួច ធ្វើការបានប្រាក់តិចតួច។ បើនិយាយពីសុខភាពរបស់ស្ត្រីគឺយើងផ្ដល់សេវាសុខភាពពុំយកប្រាក់ ហើយវិស័យអប់រំវិញ យ៉ាងតិចស្ត្រីយើងរៀនបាន ៩ឆ្នាំ ទើបអាចទៅប្រើការសម្រាប់ការងារសមរម្យបាន»។
កញ្ញា តាន់ ស៊ីនឌី និស្សិតពីសកលវិទ្យាល័យក្រុងឈីកាហ្គោ (Chicago) ដែលបានអញ្ជើញមកចូលរួមដែរនោះ បានបង្ហាញការចាប់អារម្មណ៍ថា សាររបស់លោកស្រី មូរ សុខហួរ គឺចង់ផ្ញើជូនដល់ស្ត្រីទាំងអស់ក្នុងពិភពលោកឲ្យចូលរួមយ៉ាងសកម្ម ក្នុងឆាកនយោបាយ ដើម្បីឲ្យមានការផ្លាស់ប្ដូរ។
កញ្ញា តាន់ ស៊ីនឌី បន្តថា ៖ «ស្ត្រីចែករំលែកបទពិសោធន៍ពីគ្នា ទៅវិញទៅមក ហើយគេមានសាររួមដូចគ្នា គឺមានន័យថា គេចង់បានសិទ្ធិ ចង់បានសេរីភាពដើម្បីដោះស្រាយបញ្ហារបស់គេ។ សំខាន់សាររបស់លោកស្រី មូរ សុខហួរ គឺចង់ឲ្យវិទ្យាស្ថានជាតិដើម្បីលទ្ធិប្រជាធិបតេយ្យ ទីភ្នាក់ងារជំនួយសហរដ្ឋអាមេរិក ក្រសួងការបរទេសសហរដ្ឋអាមេរិក និងមេដឹកនាំទាំងអស់ក្នុងពិភពលោក ត្រូវតែហ៊ាននិយាយឡើងដើម្បីផ្ដល់ការគាំទ្រដល់ស្ត្រី។ ចំណែកស្ត្រីវិញ គេបានប្រុងប្រៀបខ្លួនជានិច្ច ដើម្បីធ្វើឲ្យមានការផ្លាស់ប្ដូរ គេត្រូវការគាំទ្រ និងជួយឧបត្ថម្ភពីសហគមន៍អន្តរជាតិ។ ស្ត្រីនឹងធ្វើការទំនាក់ទំនងជាមួយស្ត្រីនៅប្រទេសផ្សេងៗទៀត ហើយគេត្រូវដឹងថា ស្ត្រីទាំងនោះអាចមានលទ្ធភាពធ្វើឲ្យជីវិតរបស់គេផ្លាស់ប្ដូរបាន»។
នៅក្នុងបទបង្ហាញស្ដីពីស្ត្រីនិងការបោះឆ្នោតនៅកម្ពុជា គឺមានការបញ្ចាំងវីដេអូផងដែរ អំពីការចូលរួមរបស់ស្ត្រីនៅតាមមូលដ្ឋានជាច្រើននៅក្នុងប្រទេស កម្ពុជា។ ភ្ញៀវដែលចូលរួមប្រមាណជិត ៥០នាក់ គឺមកពីស្ថាប័នជាច្រើននៅសហរដ្ឋអាមេរិក ក្នុងនោះមានមន្ត្រីពីខាងក្រសួងការបរទេស ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) និងមានអ្នកយកព័ត៌មានជាច្រើនទៀត៕
No comments:
Post a Comment