ស្ត្រី​កម្ពុជា​ក្នុង​ដំណាក់កាល​នៃ​ការ​វិវត្ត​ បច្ចេកវិទ្យា​ព័ត៌មាន

លោកស្រី ជឹម ម៉ាណាវីរាជធានី ​ភ្នំពេញ៖ ថ្ងៃ​ទី៨ មីនា គឺ​ជា​ថ្ងៃ​ពិសេស​សម្រាប់​ស្ត្រី​នៅ​ទូទាំង​ពិភពលោក ដែល​ទាំង​ស្ត្រី និង​បុរស​ប្រារព្ធ "ទិវា​សិទ្ធិ​នារី​អន្តរជាតិ"។ ជា​ការ​ពិត​ទិវា​នេះ​បាន​រៀបចំ​ឡើង​ជា​រៀងរាល់​ឆ្នាំ​នៅ​ថ្ងៃ​ទី៨ មីនា ប៉ុន្តែ​អ្វី​ដែល​គួរ​ឲ្យ​ចាប់​អារម្មណ៍​នា​ឆ្នាំ​នេះ គឺ​ទិវា​នេះ​បាន​ធ្វើ​ឡើង​ក្នុង​ដំណាក់កាល​នៃ​ការ​វិវត្ត​យ៉ាង​គំហុក​របស់​ បច្ចេកវិទ្យា​គមនាគមន៍​ព័ត៌មានវិទ្យា។
ដើម្បី​ជា​ការ​ស្វែងយល់​បន្ថែម​ស្ដីពី​ផលប្រយោជន៍​បច្ចេកវិទ្យា​គមនាគមន៍​ ព័ត៌មានវិទ្យា​ទាក់ទិន​នឹង​ស្ត្រី​អ្នក​យក​ព័ត៌មាន​យើង​បាន​ធ្វើ​បទសម្ភាសន៍ ​មួយ​ជាមួយ​លោកស្រី ជឹម ម៉ាណាវី នាយិកា​ប្រតិបត្តិ​អង្គការ​វិទ្យាស្ថាន​បើក​ទូលាយ​ដែល​មាន​ខ្លឹមសារ​ ទាំងស្រុង​ដូច​ខាងក្រោម៖
អ្នក​យក​ព័ត៌មាន៖ តើ​អ្វី​ទៅ​ជា​បច្ចេកវិទ្យា​គមនាគមន៍​ព័ត៌មានវិទ្យា?
លោកស្រី ជឹម ម៉ាណាវី បច្ចេកវិទ្យា​គមនាគមន៍​ព័ត៌មានវិទ្យា ដែល​ភាសា​អង់គ្លេស​ហៅ​ថា Information Communication Technology ហៅ​កាត់​ថា ICT មាន​ន័យ​ទូលំទូលាយ​សំដៅ​ទៅ​លើ​ឧបករណ៍​និង​វេទិកា ដែល​យើង​ប្រើ​សម្រាប់​ការ​ប្រាស្រ័យ​ទាក់ទង​នឹង​ការ​ផ្សព្វផ្សាយ​ព័ត៌មាន។ ជា​ឧបករណ៍​បច្ចេកវិទ្យា​គមនាគមន៍​ព័ត៌មាន​វិទ្យា រួម​បញ្ចូល​ទាំង​វិទ្យុ ទូរស័ព្ទ​ដៃ ការ​ផ្សព្វផ្សាយ​តាម​ទូរទស្សន៍ និង​អ៊ីនធឺណិត​ជាដើម។ ពេល​ខ្លះ​បច្ចេកវិទ្យា​គមនាគមន៍​ព័ត៌មាន​វិទ្យា​ត្រូវ​បាន​គេ​យល់​ថា​មាន​ ទម្រង់​ចាស់​និង​ថ្មី។ បច្ចេកវិទ្យា​គមនាគមន៍​ព័ត៌មាន​វិទ្យា​ទម្រង់​ចាស់​ចង់​សំដៅ​ទៅ​លើ​ការ​ បញ្ជូន​ព័ត៌មាន ដូចជា តាមរយៈ​វិទ្យុ។ ចំណែក​ឯ​ទម្រង់​ថ្មី​សំដៅ​ទៅ​លើ​ការ​បញ្ជូន​ព័ត៌មាន​និង​ឯកសារ​ផ្សេងៗ​ តាមរយៈ​ឌីជីថល​ជាដើម ។

អ្នក​យក​ព័ត៌មាន៖ តើ​បច្ចេកវិទ្យា​គមនាគមន៍​ព័ត៌មាន​វិទ្យា​នេះ​មាន​ប្រយោជន៍​អ្វី​ខ្លះ​ចំពោះ ​ស្ត្រី​កម្ពុជា​យើង?
លោកស្រី ជឹម ម៉ាណាវី ៖ ពេល​ណា​ស្ត្រី​មាន​លទ្ធភាព​ចូល​ទៅ​កាន់ និង​ប្រើប្រាស់​បច្ចេកវិទ្យា​គមនាគមន៍​ព័ត៌មាន​វិទ្យា ពេល​នោះ​ស្ត្រី​បាន​ចូល​ទៅកាន់​ទីកន្លែង​ប្រមូល​ផ្ដុំ​ព័ត៌មាន​និង​ ចំណេះដឹង។ ឧទាហរណ៍​ដូចជា​ការ​ចូល​ទៅ​អាន​និង​ប្រើប្រាស់​ព័ត៌មាន​តាម​គេហទំព័រ​ជាដើម​ ដែល​ជា​ប្រភព​ផ្ដល់​ព័ត៌មាន​ច្រើន​លើសលប់​ដែល​ស្ត្រី​ត្រូវ​ការ ដើម្បី​ពិភាក្សា ចែករំលែក​ព័ត៌មាន​ជាដើម ធ្វើ​ឲ្យ​សំឡេង​ស្ត្រី​មាន​ភាព​ខ្លាំង​ជាង។ ក្រៅពី​នោះ អ៊ីនធឺណិត​ក៏​ជា​កន្លែង​មួយ​ដែល​មាន​សុវត្ថិភាព​សម្រាប់​ស្ត្រី​ក៏​ដូចជា​ បុរស​ចូលរួម​ចែករំលែក​កង្វល់​រួម​នឹង​សម្រាប់​ការ​បញ្ចេញ​មតិ​ដោយ​សេរី ដោយ​មិន​គិត​ពី​ទីកន្លែង ជាតិសាសន៍​ឬ​អាយុ​ឡើយ។ អង្គការ​និង​បណ្ដាញ​ស្ត្រី​នៅ​ប្រទេស​ជាច្រើន​នៅ​ទូទាំង​ពិភពលោក បាន​ប្រើ​ប្រាស់​ព័ត៌មាន​ឬ​ឯកសារ​ពី​គេហទំព័រ និង​ការ​ពិភាក្សា​តាមរយៈ​អេឡិចត្រូនិក​សម្រាប់​ស្វែងរក​ការ​គាំទ្រ​ដល់​ សកម្មភាព​ជាក់លាក់ និង​ដើម្បី​រួម​គ្នា​អភិវឌ្ឍ​យុទ្ធសាស្ត្រ​រួម​ជា​សាកល។ ពួកគេ​បាន​ប្រើប្រាស់ ICT ដើម្បី​ពង្រឹង​ចលនា​ស្ត្រី​និង​ពង្រឹង​បណ្ដាញ​តភ្ជាប់​គ្នា ដោយ​ពួកគេ​បាន​យល់​អំពី​សក្ដានុពល​និង​កំហិត​របស់​ខ្លួន។ ម្យ៉ាងវិញទៀត​ការ​ប្រាស្រ័យ​ទាក់ទង​គ្នា​ធ្វើ​ឲ្យ​បុរស​កាន់តែ​យល់​អំពី​ តម្រូវ​ការ​និង​តួនាទី​របស់​ស្ត្រី​ក្នុង​សេដ្ឋកិច្ច​សង្គម​និង​នយោបាយ ដែល​អាច​ចូលរួម​កាត់បន្ថយ​នូវ​ផ្នត់​គំនិត​រើសអើង​យេនឌ័រ​ផង​ដែរ។
អ្នក​យក​ព័ត៌មាន​៖ តើ​កន្លង​មក​អង្គការ​របស់​លោកស្រី​បាន​ធ្វើ​អ្វី​ខ្លះ ដើម្បី​ជួយ​ឲ្យ​ស្ត្រី​កម្ពុជា​អាច​ប្រើប្រាស់​បច្ចេកវិទ្យា​គមនាគមន៍​ ព័ត៌មានវិទ្យា​នេះ​បាន?
លោកស្រី ជឹម ម៉ាណាវី ៖ អង្គការ​វិទ្យាស្ថាន​បើក​ទូលាយ​បាន​សហការ​ជាមួយ​ក្រសួង​កិច្ចការ​នារី និង​អង្គការ​មិន​មែន​រដ្ឋាភិបាល​ជាង​១០ទៀត​ដែល​ធ្វើ​ការងារ​ទាក់ទង​នឹង​ ស្ត្រី និង​សិទ្ធិ បាន​រៀបចំ​ជា​កិច្ចប្រជុំ​ពិគ្រោះ​យោបល់​និង​សិក្ខាសាលា​ជាច្រើនលើក​អំពី​ ការ​ជំរុញ​ការ​បញ្ជ្រាប​គោលនយោបាយ​លើក​ទឹកចិត្ត​ស្ត្រី​ចូលរួម​ក្នុង​ការ​ ប្រើប្រាស់​និង​អភិវឌ្ឍ​បច្ចេកវិទ្យា គមនាគមន៍​ព័ត៌មានវិទ្យា ទៅ​ក្នុង​គោលនយោបាយ​នានា​របស់​រដ្ឋាភិបាល។កិច្ចប្រជុំ​ក៏​បាន​ផ្ដល់​ ចំណេះដឹង​អំពី​តម្រូវការ​ប្រើប្រាស់​បច្ចេកវិទ្យា​គមនាគមន៍​ព័ត៌មានវិទ្យា​ ក្នុង​ការ​ទប់ស្កាត់​អំពើ​ហិង្សា​លើ​ស្ត្រី។ក្រៅពី​នោះ​អង្គការ​វិទ្យាស្ថាន ​បើក​ទូលាយ​ក៏​បាន​សហការ​ជាមួយ​អង្គការ Association for Progressive Communications-APC អនុវត្ត​កម្មវិធី ការ​ពង្រឹង​សមត្ថភាព​ក្នុង​វិស័យ​នេះ​ដល់​ស្ត្រី និង​ដល់​ស្ថាប័ន​រដ្ឋាភិបាល​ដូចជា ក្រសួង​កិច្ចការ​នារី ក្រសួង​ព័ត៌មាន ក្រសួង​ព្រះបរមរាជវាំង អគ្គលេខាធិការដ្ឋាន​ព្រឹទ្ធសភា និង​អង្គការ​មិនមែន​រដ្ឋាភិបាល​មួយ​ចំនួន​ទៀត ដើម្បី​ទប់ស្កាត់​អំពើ​ហិង្សា​លើ​ស្ត្រី និង​កុមារ។
អ្នក​យក​ព័ត៌មាន៖ លើ​លោកស្រី​គិត​ថា ការ​យល់ដឹង​របស់​ស្ត្រី​កម្ពុជា​នា​ពេល​បច្ចុប្បន្ន​លើ​បច្ចេកវិទ្យា​ គមនាគមន៍​ព័ត៌មានវិទ្យា​នេះ មាន​ការ​ខុសគ្នា​យ៉ាង​ដូចម្ដេច បើ​ប្រៀបធៀប​ឆ្នាំ​មុន​ៗ ?
លោកស្រី ជឹម ម៉ាណាវី ៖ តាមរយៈ​កម្មវិធី​បណ្ដុះបណ្ដាល​របស់​យើង​ជាច្រើន​កន្លង​មក​យើង​សង្កេត​ឃើញ​ថា អ្នក​ចូលរួម​មាន​ចំណេះដឹង​អំពី​គោលគំនិត​ទូទៅ​នៃ​បច្ចេកវិទ្យា​គមនាគមន៍​ ព័ត៌មានវិទ្យា និង​អំពី​របៀប​ប្រើប្រាស់ ICT ប្រកបដោយ​យុទ្ធសាស្ត្រ ធ្វើ​ឲ្យ​លទ្ធផល​ការងារ​ស្ថាប័ន​មាន​ប្រសិទ្ធភាព​ជាង​មុន។ ស្ត្រី​ដែល​ជា​មន្ត្រី និង​បុគ្គលិក​ស្ថាប័ន​បាន​ចាប់ផ្ដើម​យល់​អំពី​ផលប្រយោជន៍​នៃ​ការ​ប្រើប្រាស់ ICT និង​ថា ICT មិន​មែន​សំដៅ​តែ​លើ​ការ​ប្រើប្រាស់​កុំព្យូទ័រ​ប៉ុណ្ណោះ​ទេ តែ​សំខាន់​ជាង​នោះ​គឺ ការ​ប្រើប្រាស់​ចែករំលែក​ព័ត៌មាន​ការ​ពិភាក្សា​និង​ស្វែងរក​ការ​គាំទ្រ​ តាមរយៈ​ការ​ប្រើ​បច្ចេកវិទ្យា​អ៊ីនធឺណិត។
អ្នក​យក​ព័ត៌មាន៖ តើ​អ្វី​ជា​ការ​ប្រឈម​ដែល​ស្ត្រី​កម្ពុជា​មិន​អាច​ទទួល​បាន​ចំណេះដឹង​ផ្នែក​ បច្ចេកវិទ្យា​គមនាគមន៍​ព័ត៌មានវិទ្យា?
លោកស្រី ជឹម ម៉ាណាវី៖ កង្វះ​គោលនយោបាយ​ជាក់លាក់​ជំរុញ​លើក​ទឹកចិត្ត​ស្ត្រី​ឲ្យ​ចូលរួម​ក្នុង​ការ​ អភិវឌ្ឍ​បច្ចេកវិទ្យា​គមនាគមន៍​ព័ត៌មានវិទ្យា។ ក្រៅពី​នោះ​កត្តា​សង្គម​និង​វប្បធម៌​បាន​ជះឥទ្ធិពល​ខ្លាំង​ដល់​ការ​ចូលរួម​ របស់​ស្ត្រី​ក្នុង​បញ្ហា​នេះ ។ ផ្នត់គំនិត​សង្គម​យល់ថា ការ​រៀន​សូត្រ និង​ការងារ​វិស័យ​បច្ចេកវិទ្យា​គមនាគមន៍​ព័ត៌មានវិទ្យា គឺ​ជា​ការងារ​បុរស ព្រោះ​ការងារ​នេះ ទាមទារ​ឲ្យ​មាន​ភាព​វៃ​ឆ្លាត​ខាង​គណិតវិទ្យា​គិត​ច្រើន និង​ប្រើ​កម្លាំងកាយ​ច្រើន ដែល​មាន​តែ​បុរស​ទេ​ទើប​ធ្វើ​បាន។ ជាង​នេះ​ទៅទៀត ការ​ទទួល​ខុសត្រូវ​ច្រើន​កន្លែង​ធ្វើការ​ផង​នៅ​ផ្ទះ​ផង បាន​កាត់បន្ថយ​ពេលវេលា​ស្ត្រី​ក្នុង​ការ​ចូល​ទៅ​កាន់​បច្ចេកវិទ្យា​គមនាគមន៍ ​ព័ត៌មានវិទ្យា។
អ្នក​យក​ព័ត៌មាន៖ ដោយ​បច្ចេកវិទ្យា​គមនាគមន៍​ព័ត៌មានវិទ្យា​មាន​ប្រយោជន៍​ដល់​ស្ត្រី តើ​លោកស្រី​មាន​អ្វី​បន្ថែម​ទេ ដើម្បី​ធ្វើ​ឲ្យ​ស្ត្រី​កម្ពុជា​អាច​ទទួល​បាន​ចំណេះដឹង​នេះ​កាន់តែ​មាន​ វិសាលភាព?
លោកស្រី ជឹម ម៉ាណាវី៖ យើង​គួរតែ​មាន​គោលនយោបាយ​ជាក់លាក់​ជំរុញ​លើកទឹកចិត្ត​ស្ត្រី​ឲ្យ​ចូលរួម​ ក្នុង​ការ​អភិវឌ្ឍ​បច្ចេកវិទ្យា​គមនាគមន៍​ព័ត៌មានវិទ្យា មាន​ដូចជា​គោលនយោបាយ​ជំរុញ​ឲ្យ​មាន​សិស្ស​ស្រី​ចូល​រៀន​ខាង ICT ឲ្យ​បាន​ច្រើន ការ​បញ្ជូន​បុគ្គលិក​ស្រី​ចូលរួម​វគ្គ​បណ្ដុះបណ្ដាល ការ​លើកទឹកចិត្ត​ផ្ដល់​តួនាទី​ដល់​ស្ត្រី​ធ្វើ​ជា​អ្នក​ដឹកនាំ​ធ្វើ​សេចក្ដី ​សម្រេចចិត្ត និង​ចូលរួម​ក្នុង​ការ​ធ្វើ​ផែនការ​អភិវឌ្ឍ​វិស័យ​បច្ចេកវិទ្យា​គមនាគមន៍ ព័ត៌មានវិទ្យា។ ម្យ៉ាងវិញទៀត​ការ​ធ្វើ​ឲ្យ​តម្លៃ​ចូល​ទៅកាន់​អ៊ីនធឺណិត​មាន​តម្លៃ​ទាប ក៏​ជា​កត្តា​ចូលរួម​ជំរុញ​ការ​ចូលរួម​របស់​ស្ត្រី​ក្នុង​វិស័យ​បច្ចេកវិទ្យា ​គមនាគមន៍​ព័ត៌មានវិទ្យា​នេះ​ផង​ដែរ ៕

No comments:

Post a Comment