រូបភាពសារព័ត៍មានកោះសន្តិភាព
បុរីញូវយ៉ក ៖ សម័យប្រជុំពេញអង្គរបស់កិច្ចប្រជុំជាន់ខ្ពស់មហាសន្និបាតអង្គការសហប្រជាជាតិឆ្នាំ២០១១ ស្តីពីអេដស៍ បានប្រារព្ធពិធីបើកនៅទីស្នាក់ការកណ្តាលរបស់អង្គការសហប្រជាជាតិបុរីញូវយ៉ក សហរដ្ឋអាមេរិក នៅព្រឹកថ្ងៃទី៨ មិថុនា ឆ្នាំ២០១១ ។ ជាមួយនឹងកិច្ចប្រជុំជាន់ខ្ពស់ដ៏មានសារសំខាន់នេះ វេទិកាជាប្រវត្តិសាស្ត្ររបស់ស្ត្រីទី១ ទូទាំងពិភពលោក ដើម្បីលុបបំបាត់ការចម្លងថ្មីមេរោគអេដស៍ពីមាតាទៅកុមារ បានប្រារព្ធពិធីបើកជាផ្លូវការនៅរសៀលថ្ងៃទី៨ មិថុនា ដោយមានវត្តមានអញ្ជើញចូលរួមពីស្ត្រីទី១ ភរិយាថ្នាក់ដឹកនាំប្រមុខរដ្ឋ ប្រមុខរដ្ឋាភិបាល មកពីប្រទេសចំនួន២៧លើពិភពលោក និងពីតំណាងឥស្សរជនជាន់ខ្ពស់របស់រដ្ឋាភិបាល អង្គការជាតិ-អន្តរជាតិ និងសង្គមស៊ីវិលសរុបប្រមាណ៥០០នាក់ ។ព្រឹត្តិការណ៍ដ៏មានសារសំខាន់ និងជាប្រវត្តិសាស្ត្រនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់លោកជំទាវបាន ស៊ូនតេក (Ban Soon Taek) ភរិយាលោកបាន គីមូន អគ្គលេខាធិការអង្គការសហប្រជាជាតិ លោកជំទាវ វ៉ោយហ្សេរ៉ូ អាហ្ស៊ីប ម៉េសហ្វ៊ីន (Woizero Azeb Mesfin) ស្ត្រីទី១របស់ប្រទេសអេត្យូពី និងជាប្រធានអង្គការស្ត្រីនៅបណ្តាប្រទេសអាហ្វ្រិក លោកម៉ាយឃែល សាយឌីបេ (Michel Sidibe) នាយករដ្ឋប្រតិបត្តិនៃកម្មវិធីរួមរបស់អង្គការសហប្រជាជាតិស្តីពីមេរោគអេដស៍ និងជំងឺអេដស៍ និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ស្ត្រីទី១ របស់កម្ពុជា ភរិយាដ៏ឧត្តុង្គឧត្តមរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ថ្លែងសុន្ទរកថាបើកកិច្ចប្រជុំកំពូលស្ត្រីទី១ ទូទាំងពិភពលោក ដើម្បីលុបបំបាត់ការចម្លងថ្មី មេរោគអេដស៍ពីមាតាទៅទារក លោកជំទាវបាន ស៊ូនតេក បានគូសបញ្ជាក់ថា ការចម្លងមេរោគអេដស៍ពីមាតាទៅទារក គឺជារឿងមួយដ៏អយុត្តិធម៌ នៅលើពិភពលោកនៃយើង ហើយក៏ជារឿងមួយដែលគេអាចទប់ស្កាត់ជាមុនបាន ។ ទោះបីជាមានការរីកចម្រើនគួរឱ្យកត់សម្គាល់យ៉ាងណាក្តី ក្នុងរយៈពេលជាងមួយទសវត្សកន្លងមក ក៏ដូចសព្វថ្ងៃនេះដែរ ក្នុងមួយថ្ងៃៗមានទារកប្រមាណជា១ពាន់នាក់ ដែលកើតមកផ្ទុកមេរោគអេដស៍ ហើយជំងឺអេដស៍នេះ គឺជាមូលហេតុចម្បងនៃមរណ ភាពរបស់មាតា នៅក្នុងប្រទេសកំពុងអភិវឌ្ឍន៍ ។ ថ្ងៃនេះស្ត្រីទី១ នៃពិភពលោកយើងសុទ្ធតែមានការប្តេជ្ញាចិត្តដូចគ្នាគឺអាចសម្តែងនូវសុច្ឆន្ទៈនយោបាយរបស់ខ្លួន និងបញ្ជាក់ពីសេចក្តីត្រូវការក្នុងការធានាឱ្យបានថា ពុំមានទារកណាម្នាក់កើតមកមានផ្ទុកមេរោគអេដស៍តទៅទៀតឡើយ នៅឆ្នាំ២០១៥ ខាងមុខនេះ ជាពេលវេលាដ៏ធំចំបង ដែលយើងបានសម្រេចនៅទីនេះ។
លោកម៉ាយឃែល សាយឌីបេ (Michel Sidibe) នាយកប្រតិបត្តិនៃកម្មវិធីរួមរបស់អង្គការសហប្រជាជាតិ ស្តីពីមេរោគអេដស៍ និងជំងឺអេដស៍ មានប្រសាសន៍ឱ្យដឹងដែរថា ភាពរំជួលចិត្តចំពោះបញ្ហានេះ នឹងធ្វើឱ្យយើងប្តេជ្ញាចិត្តយ៉ាងច្បាស់ និងឱ្យកាន់តែប្រសើរឡើង ដល់ការលើកកម្ពស់សុខភាពស្ត្រី និងកុមារ និងក្នុងការប្រយុទ្ធនឹងជំងឺអេដស៍ ។
បន្ទាប់មកលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ស្ត្រីទី១ នៃព្រះរាជាណាចក្រកម្ពុជា និងជាភរិយាដ៏ឧត្តុង្គឧត្តមសម្តេចអគ្គមហាសេនាបតីតេជោហ៊ុន សែន បានអញ្ជើញថ្លែងបទអន្តរាគមន៍នៅក្នុងពិធីបើកកិច្ចប្រជុំស្ត្រីទី១ ទូទាំងពិភពលោក ដើម្បីលុបបំបាត់ការចម្លងមេរោគអេដស៍ពីមាតាទៅទារក ។
បន្ទាប់ពីបទអន្តរាគមន៍នៃលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន រួចមក លោកជំទាវជាស្ត្រីទី១នៃបណ្តាប្រទេសចូលរួមបានឡើងថ្លែងពីស្ថានភាព ការប្រយុទ្ធប្រឆាំងជំងឺអេដស៍ និងបទពិសោធន៍នៃប្រទេសរៀងៗខ្លួន ព្រមទាំងបានសម្តែងនូវការគាំទ្រចំពោះការខិតខំលុបបំបាត់ ការចម្លងថ្មីនៃមេរោគអេដស៍ពីមាតាទៅទារក ដោយបានឯកភាពគ្នាកំណត់ថា អេដស៍ វាមានន័យលើសពីជំងឺឆ្លង ព្រោះអេដស៍ជាបញ្ហាសិទ្ធិមនុស្ស សេដ្ឋកិច្ច សង្គម និងការអភិវឌ្ឍរបស់សង្គមជាតិ និងរបស់ពិភពលោកទាំងមូល ។ កិច្ចប្រជុំរបស់ស្ត្រី១របស់ពិភពលោក នៅពេលនេះបានគូសបញ្ជាក់ថា ការលុបបំបាត់បាននូវការចម្លងមេរោគអេដស៍ គឺជាការលុបបំបាត់បាននូវរលកថ្មីនៃការរីករាលដាលមេរោគអេដស៍ ឬជាការសង្គ្រោះបានជីវិតម្តាយ ជាការកសាងបាននូវសុភមង្គលគ្រួសារ សុខុមាលភាពសង្គម និងជាការឈានទៅសម្រេចបានចក្ខុវិស័យពុំមានការចម្លងថ្មីមេរោគអេដស៍ ពុំមានការរើសអើង និងពុំមាននរណាម្នាក់ស្លាប់ដោយសារមេរោគអេដស៍ឡើយនៅឆ្នាំ២០១៥ ។
ជាមួយគ្នានេះដែរ លោកជំទាវស្ត្រី១ ដែលចូលរួមកិច្ចប្រជុំថ្នាក់ពិភពលោកបានមានប្រសាសន៍គូសបញ្ជាក់ពីការប្តេជ្ញាចិត្តខិតខំប្រឹងប្រែង ដើម្បីសម្រេចចក្ខុវិស័យខាងលើនេះ និងបានអំពាវនាវឱ្យសហគមន៍ជាតិ-អន្តរជាតិ រដ្ឋាភិបាល អង្គការសង្គមស៊ីវិល ដៃគូអភិវឌ្ឍន៍របស់សហប្រជាជាតិ អង្គការមូលនិធិនានា សូមបន្តការចូលរួមគាំទ្រទាំងស្មារតី បច្ចេកទេស ថវិកា ជាពិសេសបង្កើនទ្វេដងថែមទៀត លើសាមគ្គីភាព បន្តពង្រឹងពង្រីកកិច្ចសហប្រតិបត្តិការទូលំទូលាយ ដើម្បីរួមកម្លាំងគ្នា «កុំសាងពិភពលោកដែលមានមេរោគអេដស៍ធ្វើឱ្យបញ្ហាអេដស៍ក្លាយទៅជាស្រមោលនៅក្នុងអតីតកាល»៕
No comments:
Post a Comment