ដោយ សុខ សេរី
2011-10-14
តំណាងរាស្ត្រគណបក្ស សម រង្ស៊ី អ្នកស្រី មូ សុខហូរ បានអះអាងនៅថ្ងៃ១៤ ខែតុលា ឆ្នាំ២០១១ថា លោកនាយករដ្ឋមន្ត្រី ហ៊ុន សែន និងលោក សុខ អាន ឧបនាយករដ្ឋមន្រ្តី និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានយល់ព្រមតាមសំណើរបស់អ្នកស្រី សុំឲ្យផ្អាកការបញ្ជូនពលការិនីទៅប្រទេសម៉ាឡេស៊ី ដោយសារតែមានការព្រួយបារម្ភលើស្ថានការណ៍ជួញដូរមនុស្ស។
១៤-តុលា-២០១១៖ តំណាងរាស្ត្រគណបក្ស សម រង្ស៊ី អ្នកស្រី មូរ សុខហួរ ផ្ដល់បទសម្ភាសន៍ដល់អ្នកកាសែត នៅរដ្ឋសភា។
ក្រុមអ្នកកាសែតបានព្យាយាមសុំការបញ្ជាក់ពីលោក សុខ អាន អំពីរឿងនេះ នៅឯសភាជាតិ ប៉ុន្តែលោក សុខ អាន បានបដិសេធមិនផ្ដល់អត្ថាធិប្បាយណាមួយទេ ដោយលោកជាប់រវល់។
នាយកដ្ឋានប្រឆាំងការជួញដូរមនុស្ស និងការពារអនីតិជនរបស់ក្រសួងមហាផ្ទៃ បានបើកយុទ្ធនាការយ៉ាងសកម្មកាលពីសប្ដាហ៍កន្លងទៅនេះ ប្រឆាំងការជួញដូរមនុស្សនៅក្រុមហ៊ុន ធី អែន ភី (T&P) នៅខេត្តកំពង់ឆ្នាំង គឺសង្គ្រោះបានពលការិនីមិនទាន់គ្រប់អាយុ ១៨ឆ្នាំ ចំនួន ៣៥នាក់ ក្រោយពីមានបណ្ដឹងពីឪពុកម្ដាយរបស់ពលការិនីទាំងនោះ។
មេការចំនួន ៤នាក់ ត្រូវបានចាប់ខ្លួនកាលពីសប្ដាហ៍កន្លងទៅនេះ នៅខេត្តកំពង់ឆ្នាំង។
ក្រុមហ៊ុន ធី អែន ភី មានគម្រោងនាំចេញពលការិនីទាំងនោះទៅធ្វើការងារនៅក្នុងប្រទេស ម៉ាឡេស៊ី ប៉ុន្តែឯកសារ និងឈ្មោះរបស់ពលករិនីទាំងនោះត្រូវបានគេក្លែងបន្លំ។
អាជ្ញាធរប្រឆាំងការជួញដូរមនុស្ស កំពុងតែបន្តយុទ្ធនាការនេះទៀត នៅខេត្តពោធិ៍សាត់៕
No comments:
Post a Comment