អ្នក​​​កាសែត​​​​បរទេស2​​​នាក់ស្លាប់ក្នុង​​ការប្រយុទ្ធគ្នា​​នៅស៊ីរី​

យោង​តាម​​​​ក្រុម​ប្រឆាំង​​ស៊ីរី​ថា ​អ្នកកាសែត​​​បារាំង​ម្នាក់​​ លោក REMI OCHLIK និង​ស្ត្រី​អ្នក​​កាសែត​​​អាមេ​រិក​​លោកស្រី​​ MARIE COLVIN បានត្រូវស្លាប់ កាលពីថ្ងៃទី​​២២ កុម្ភៈ ​​ក្នុងទីក្រុង​​​ហូម ​ភាគ​កណ្តាល​ស៊ីរី ដោយសារ​ត្រូវ​គ្រាប់ផ្លោង​។​ លោក REMI  OCHLIK អាយុ​​​២៨​ឆ្នាំ ​ជា​អ្នក​កាសែត​​ថត​រូប​​សង្គ្រាម​​ឱ្យទីភ្នាក់ងារ​​​​ព័ត៌មាន​បារាំង​​ IP.3 PRESS​ ​ដែល​លោក​រួម​គ្នា​​បង្កើត​​​​ឡើង​​​​កាលពី​ឆ្នាំ​​​២០០៥ ។
លោក​ធ្លាប់​ចុះ​ទៅថត​រូបភាព​ក្នុង​បដិវត្តន៍​អារ៉ាប់​ឆ្នាំ​​​២០១១ ​​នៅ​ប្រទេស​ទុយនីស៊ី​​ អេហ្ស៊ីប​​​​ និងលីប៊ី ​​ហើយ​ចេញផ្សាយ​​ក្នុងទស្សនាវដ្តី​​​បារាំង PARIS MATCH កាសែត LE MONDE ទូរទស្សន៍​ VSD ទស្សនាវដ្តី​​​ TIME MAGAZINE  ឬកាសែត​ THE WALL STREET JOURNAL ។​ លោក​ដណ្តើម​​​បានពានរង្វាន់​​ GRAND PRIX  នៃ មហោស្រព​​​​កាសែត​អឺរ៉ុប SCOOP GRAND  LILLE កាលពី​ខែ​ធ្នូ ឆ្នាំ ​​​២០១១ ហើយ​ជា​​ជ័យលាភី​​​​ពានរង្វាន់​ WORLD ​PRESS ដោយសារ​​ព័ត៌មាន​មួយ​របស់​លោកនៅលីប៊ី ។
ចំណែក​លោកស្រី MARIE  COLVIN វិញ ជាជនជាតិ​​អាមេរិក​​រស់នៅ​ក្នុង​​ទីក្រុងឡុងដ៍ ​​​ហើយ​ជាអ្នក​​យកព័ត៌មាន​​​ពីសង្គ្រាម​​សម្រាប់​​កាសែត​​​អង់​គ្លេស ​​SUNDAY  TIMES ដោយ​លោកស្រី​​​ធ្លាប់​ចុះ​​​យកព័ត៌​មាន​​ក្នុងជម្លោះ​​​ជា​ច្រើន​​នៅយូហ្គោស្លាវី ​​អ៊ី​រ៉ង់ ​​ស្រីលង្កា ​ហើយថ្មីៗ​នេះ ​​​ចូល​យកព័ត៌មាន​ក្នុង​​​ព្រឹត្តិការណ៍​​​​និទាឃ​រដូវ​​​​​អារ៉ាប់ រួច​​លោកស្រី​​​ទើប​​ចុះ​​មក​យក​ព័ត៌​មាន​នៅ​​​ស៊ីរី​។​ សាក្សី​ម្នាក់​បញ្ជា​ក់​​​ប្រាប់​​រ៉យទ័រ​​​ថា ​​គ្រាប់​ផ្លោង​មួយ​​​​គ្រាប់ធ្លាក់​​​ចំ​ផ្ទះមួយដែលអ្នកកាសែត​​​ទាំង​​​២នាក់​​នេះ​​ស្នាក់ ហើយ​​​ពួកគេ​​បន្ទាប់​មក​​ត្រូវ​គ្រាប់​​​រ៉ុក្កែត​​​មួយគ្រាប់​ទៀត​​​ពេលរត់​​​ចេញ​។​
កាសែត​​អង់​គ្លេស ​THE TELEGRAPH លាតត្រដាង​​​​ថា ពួក​​​​ភ្នាក់ងារ​​​​សម្ងាត់​លីបង់​​​អាច​ចាប់​​បានការនិយាយ​​គ្នា​តាម​វិទ្យុ​ទាក់ទង​របស់​​កង​ទ័ព​​​ស៊ីរី ​​ហើយ​បង្ហាញ​​​ថា អ្នក​​​កាសែត​​​​ទាំង​​​​២​នាក់​ នេះត្រូវ​​គេ​ប៉ង​សម្លាប់​​​​ពេល​បាញ់​​ប្រហារ​​​​លើ​មជ្ឈ​មណ្ឌល​​​​សារព័ត៌​មាន​​​មួយ​នៅក្រុង​​​​ហូម ។ ​​​ការស្តាប់​​កិច្ចសន្យា​​​នេះ​អាច​ស្តាប់​ឮ​​ពួកនាយ​​ទាហានស៊ី​​រី​បញ្ជា​​ឱ្យសម្លាប់​អ្នក​​កាសែត​​​ទាំង​ឡាយ​ណា​ដែលស្ថិតនៅ​​​ដែនដី​​ស៊ីរី ៕​

No comments:

Post a Comment