ចាប់បង្ខាំងក្មេងស្រី13ថ្ងៃឱ្យនៅតែក្នុងបន្ទប់និងរំលោភ

ខេត្ត​រតនគិរី ៖ សមត្ថ​កិច្ច​ប៉ូលិស​​នៃ​ស្នង​ការ​ដ្ឋាន​នគរបាល​ខេត្ត​បាន​​​ឃាត់​ខ្លួន​យុវជន​ម្នាក់​ពីបទ​​ចាប់​បង្ខាំង​​ក្មេង​ស្រី​សិស្ស​សាលា​​ម្នាក់​ទុក​​​ក្នុង​ផ្ទះ​​របស់​ខ្លួន​រ​យៈ​ពេល​​១៣​ថ្ងៃ​​ ដើម្បី​រំលោភ។ ​យុវជន​ជាប់​ចោទ​​នេះ​​ឈ្មោះ​​ខាត់ សីហា ហៅ​ចែម ​អាយុ​​១៧ឆ្នាំ ​រស់​នៅស​ង្កាត់​ឡាបានសៀក ​ក្រុង​បានលុង ​ត្រូវ​​​បាន​ចាប់​ខ្លួន​នៅ​ថ្ងៃ​ទី២៥ កុម្ភៈ ​វេលា​ម៉ោង​៧​​យប់​​​នៅចំណុច​ដី​ចម្ការ​របស់​ខ្លួន​ ស្ថិត​នៅ​ភូមិតឺន ឃុំ​តឺន ​ស្រុក​កូន​មុំ ។
តាម​ការ​បំភ្លឺរបស់​​មន្ត្រី​ប៉ូលិស​​ក្រុង​បាន​លុង ឱ្យ​ដឹងថា ​​ក្មេងស្រីរងគ្រោះ​​​អាយុ​១៧ឆ្នាំ​ជា​​សិស្ស​វិទ្យា​ល័យ​ហ៊ុន​សែន ​ភូមិ​ថ្មី​ រស់​នៅ​ក្នុង​សង្កាត់​​ឡា​បាន​សៀក ក្រុង​បាន​លុង ឆ្ងាយ​ពី​​ផ្ទះ​ជន​ជាប់​ចោទ​​ប្រមាណ​៥០​-៦០​ម៉ែត្រប៉ុណ្ណោះ ។
បើ​តាម​ការ​បំភ្លឺ​ពី​​ក្មេងស្រីរងគ្រោះ​​បាន​ឱ្យ​សមត្ថ​កិច្ច​ដឹងថា នៅ​​យប់ថ្ងៃទី​១១ កុម្ភៈ ​វេលា​ម៉ោង​៨​ទៅ​៩​យប់​​ ជន​​ខាងលើ​បាន​ហៅ​នាង​ទៅ​ជួប​នៅ​ក្រោម​ផ្ទះ​​តែ​២​នាក់ទេ។ ​នៅ​យប់​នោះ​​​ដាច់​​ភ្លើង​​ងងឹតឈឹង ស្រាប់តែ​ជន​​​នោះ​ស្ទុះ​មក​ចាប់​នាង​ខ្ទប់​​​មាត់​ជាប់​ និង​លើក​បី​នាង​​ឡើង​លើ​ផ្ទះ​ចូល​ក្នុង​បន្ទប់​​ដេក ​ហើយ​រំលោភ​​នាង​​បាន​សម្រេច​​២​ដង ក្នុង​មួយ​យប់​នោះ ។ ​នាង​បាន​បន្ត​ថា ជន​នោះ​បាន​ទិ​ញ​ថ្នាំ​ម្យ៉ាង​​ឱ្យ​នាង​លេប​ចំនួន​៣​គ្រាប់ ធ្វើ​ឱ្យ​នាង​​ងងុយ​ដេក​អស់​​កម្លាំង​​ងើប​ដើរ​អត់​​​​​​​រួច​ ទោះ​ចង់​ស្រែក​​ហៅ​ឱ្យ​គេជួយ​​ក៏​អត់​កម្លាំង​​ស្រែក​ដែរ ​ហើយ​​នាង​ត្រូវបាន​​គេ​បង្ខាំង​​​អស់​​រយៈ​​ពេល​​១៣​​ថ្ងៃ ​និង​រំលោភ​បាន​សម្រេច​​៩​ដង ​និង​ឱ្យ​នាង​​​ហូប​បាយ​​តែ​ពេល​យប់​បាន​​​ចំន​ួន​៧​លើក​គត់ ​ធ្វើ​ឱ្យ​នាង​អស់​​កម្លាំង​ខ្លាំង​ណាស់​រយៈ​ពេល​១៣​ថ្ងៃ​នេះ ។
សមត្ថ​កិច្ច​ដដែល​បាន​បន្ត​ទៀតថា ​ជន​ជាប់​ចោទ​​ខាង​លើ​ពេល​ចាប់​ខ្លួន​ថ្មីៗ​​ខំ​ព្យា​យាម​​លាក់​រឿង​មិន​ព្រម​សារ​ភាព​ទេ តែ​​សមត្ថ​កិច្ច​បាន​ខិត​ខំ​ប្រើ​គ្រប់​វិធី​ ទើបគេព្រម​​ឆ្លើយ​​សារ​ភាពថា «មែន»​ តែ​​គេអត់​បាន​ចាប់​បង្ខាំង​​នាង​ទេ គឺ​នាង​ព្រម​ព្រៀង​​ដោយ​ខ្លួន​ឯង​ ព្រោះ​បាន​​ទំនាក់​ទំនង​គ្នា​៧​-​៨​ខែ​មក​ហើយ ។ ​យុវជន​​រូប​នេះ​បាន​​បដិ​សេធ​​​ពីរឿង​ទិញ​ថ្នាំ​​ឱ្យ​នាងលេប​នោះ​ថា ​មិន​ពិត​​ទេ តែ​​បាន​ទិញ​បាយ​ឱ្យ​នាង​​​​​​​​​​​​​​​​​​​​​​​ហូប​តែ​ពេល​យប់​​មែន ព្រោះ​​ពេល​ថ្ងៃ​ខ្លាច​គេ​ឃើញ​ដឹងថា​នាង​នៅ​លើ​ផ្ទះ ហើយ​​បើ​មាន​​គេ​មក​លេង​ផ្ទះ​​គេ​លើក​នាង​​ដូរ​មក​បន្ទប់​ផ្សេង​ទៀត ។
មន្ត្រី​សមត្ថ​កិច្ច​​បន្តទៀតថា ​បាន​ជា​គេ​ដឹង​ថា​នាង​​រង​គ្រោះ​នៅ​ក្នុង​បន្ទប់​​​ជន​ជាប់​ចោទ​ដោយ​សារ​តែ​​​ឪពុក​មា​​ជន​ជាប់​ចោទ​​​​ទៅ​​បូម​ទឹក​មុខ​ផ្ទះ​នោះ​​​ពេល​ឡើង​លើ​ផ្ទះ​បាន​ឮ​សំឡេង​​ក្មេង​ស្រី​​រង​គ្រោះ​​ស្រែក​ហៅ​​ឱ្យ​គេជួយ​ ទើប​បែក​ការណ៍​​​ដល់​សមត្ថ​កិច្ច​ទៅ​រំដោះ​​នាង​មក​សង្គ្រោះ​​នៅ​មន្ទីរ​ពេទ្យ​បង្អែកខេត្ត ។
ស្ត្រីជាម្តាយ​​ក្មេង​ស្រី​រងគ្រោះ​បាន​បំភ្លឺថា ​គាត់​ខំដើរ​រកកូន​ស្រី​គ្រប់ទិស​ទី​ទាំង​អស់​​ ស្រាប់តែ​​ឃើញ​កូន​​​នៅ​​ក្បែរ​ផ្ទះ​ខ្លួន​ចម្ងាយ​តែ​៥០-៦០​ម៉ែត្រ​ ​ហើយ​បើ​ទុក​នាង​តែ​៣​-៤​ថ្ងៃ​ទៀត​ពិតជ​ាស្លាប់មិន​ខាន ព្រោះ​ឃើញ​កូន​​ដេក​សន្លប់​ស្តូក​ស្តឹង​ក្នុង​ផ្ទះ​ជន​ជាប់ចោទ​​ទាំង​រាង​កាយ​ស្លេក​ស្លាំង​​ស្ទើរ​គ្មាន​​ដង្ហើម​​ទៅ​ហើយ ។
លោក​ជា សុភ័ក្ត្រ ​ព្រះរាជ​អាជ្ញា​រង​សាលា​ដំបូង​ខេត្ត​​បាន​ឱ្យដឹងថា ​ជន​ជាប់​ចោទ​ខាង​លើ​ត្រូវចោទ​ពីបទ​រំលោភ​​មាន​ស្ថាន​ទម្ងន់​ទោស​​អាចជាប់​គុក​ចាប់ពី​៧​ឆ្នាំទៅ​១៥​ឆ្នាំ ៕

No comments:

Post a Comment