នាង ជួន​ ចាន់​រតនា​ ហៅក្អយ​ អតីត​តារាកំប្លែង​ វ័ណ្ឌកដោយសារតែការ​ជួលរថយន្ត​គេយកទៅ​បញ្ចាំ សំណុំ​រឿង​ច្រើន​ស្ថិត​នៅក្នុង​ដៃ​ចៅក្រម​ និងព្រះរាជ​អាជ្ញា

ថ្ងៃចន្ទ ទី២៣ ខែឧសភា ឆ្នាំ២០១១ ម៉ោង ១៥:៥៥(ព័ត៍មានកោះសន្តិភាព)
រាជ​ធានី​ភ្នំពេញ ៖ កោះ​សន្តិ​ភាព​បាន​ចុះ​ផ្សាយ​លេខ​ម្សិល​មិញ ស្តីពី​នាង​ជួន ចាន់​រតនា ហៅ​ក្អយ តារា​កំប្លែង​ដែល​បាត់​បង់​ប្រជា​ប្រិយ​ភាព​ ត្រូវ​តំណាង​អយ្យ​ការ គឺ​លោក​គ្រី សុខអ៊ី ព្រះ​រាជ​អាជ្ញា​រង​សាលា​ដំបូង​រាជ​ធានី​​កោះ​ហៅ​ឱ្យ​ចូល​ខ្លួន​នៅ​ថ្ងៃ​ទី​ ១៩ ឧសភា ដើម្បី​សាក​សួរ​លើ​បណ្តឹង​របស់​ឈ្មោះ​ទៀង គង់ ពី​ករណី​រំលោភ​លើ​សេចក្តី​ទុក​ចិត្ត។ នាង​ក្អយ​ មិន​បាន​មាន​វត្ត​មាន​តាម​ដីកា​របស់​តំណាង​អយ្យ​ការ​ទេ។ ប្រភព​ព័ត៌​មាន​ឱ្យ​ដឹង​ថា នាង​ក្អយ បាន​​បន្ត​បន្ថែម​សេរ៉ូម​ដោយ​អះ​អាង​ថា អាការ​​រោគ​នៅ​មិន​ទាន់​ធូរ​ស្បើយ ឬ​ក៏​អាច​និយាយ​បាន​ថា នាង​ក្អយ​បន្ថែម​សេរ៉ូម​កាន់​តែ​ច្រើន​បើ​មាន​ដីកា​កោះ​ហៅ​កាន់​តែ​ច្រើន​ នោះ។
ខណៈ​ពេល​ដីកា​កោះ​ឱ្យ​ចូល​ខ្លួន​របស់​លោក​គ្រី សុខអ៊ី ព្រះ​រាជ​អាជ្ញា​រង​ពុំ​មាន​ប្រសិទ្ធ​ភាព​ ដោយ​មូល​ហេតុ​នាង​ក្អយ​មិន​គោរព​ ឬ​ក៏​យក​លេស​​ព្យួរ​សេរ៉ូម​នោះ​ នៅ​ព្រឹក​ថ្ងៃ​ទី​១៩ ឧសភា ​លោក​សុខ​ រឿន ព្រះ​រាជ​អាជ្ញា​រង​អម​សាលា​ដំបូង​រាជ​ធានី​ភ្នំពេញ ដែល​មាន​ឥទ្ធិ​ពល​ជាង​គេ​ក្នុង​ចំណោម​ព្រះ​រាជ​អាជ្ញា​រង​ទាំង​អស់​បាន​ចេញ​ ដីកា​ថ្មី​មួយ​ទៀត​កោះ​ហៅ​នាង​ក្អយ ឱ្យ​ចូល​ខ្លួន​នៅ​ថ្ងៃ​ទី​២៧ ឧសភា ខាង​​មុខ។ ដីកា​កោះ​ហៅ​ឱ្យ​ចូល​ខ្លួន​របស់​លោក​ព្រះ​រាជ​អាជ្ញា​រង​ សុខ រឿន ក៏​មិន​ខុស​ពីដីកា​កោះ​របស់​លោក​គ្រី សុខ​អ៊ី ដែរ គឺ​ហៅ​នាង​ក្អយ ឱ្យ​ចូល​ឆ្លើយ​បំភ្លឺ​រឿង​រំលោភ​លើ​សេចក្តី​ទុក​ចិត្ត។

អ្នក​តាម​ដាន​ព័ត៌​មាន​​បាន​សង្កេត​ឃើញ​ថា នាង​ក្អយ​គ្រាន់​តែ​ជា​តារា​កំប្លែង​ម្នាក់​សោះ បាន​ធ្វើ​ឱ្យ​ស្ថាប័ន​អយ្យ​ការ​វិល​ក្បុង​ចេញ​ដីកា​ព្រោង​ព្រាត​ហើយ​នៅ​តែ​ មិន​ចូល​ខ្លួន។ មាន​ការ​លើក​ឡើង​ថា នាង​ក្អយ​អាច​ត្រូវ​អ្នក​មាន​បុណ្យ​ស័ក្តិ​នៅ​ពី​ក្រោយ ឬ​ជួយ​ការ​ពារ។ បាន​ជា​គេ​ហ៊ាន​និយាយ​យ៉ាង​ដូច្នេះ ព្រោះ​គេ​នៅ​ចាំ​បាន​ថា កាល​ពី​ប៉ុន្មាន​ខែ​មុន នាង​ក្អយ​ត្រូវ​​សមត្ថ​កិច្ច​នាយក​ដ្ឋាន​នគរ​បាល​ព្រហ្ម​ទណ្ឌ​ក្រសួង​មហា​ ផ្ទៃ​ឃាត់​ខ្លួន​១​យប់​២​ថ្ងៃ ដែល​ជន​រង​គ្រោះ​ជា​ដើម​បណ្តឹង​បាន​ចាប់​ប្រគល់​ឱ្យ​សមត្ថ​កិច្ច​ជួយ​ដោះ​ ស្រាយ​រឿង​ឆបោក​ជួល​រថយន្ត​២​គ្រឿង​យក​ទៅ​ដាក់​បញ្ចាំ។ ការ​ឃាត់​ខ្លួន​នាង​ក្អយ​ពេល​នោះ មាន​​អន្តរា​គមន៍​ឱ្យ​នាង​ក្អយ​រួច​ខ្លួន​​ទៅ​ប្រកប​អាជីវ​កម្ម​របស់​នាង​ វិញ គ្រាន់​តែ​តម្រូវ​ឱ្យ​ប្រាប់ និង​ចង្អុល​ទីតាំង​ដែល​នាង​យក​រថយន្ត​គេ​ទៅ​បញ្ចាំ​ប៉ុណ្ណោះ។ ពេល​នោះ​ម្ចាស់​រថយន្ត​២​គ្រឿង​ត្រូវ​បង្ហូរ​ទឹក​ភ្នែក​ ព្រោះ​រក​ប្រាក់​១​ម៉ឺន​ដុល្លារ​ទៅ​លោះ​យក​រថយន្ត​ខ្លួន​ឯង​មក​វិញ។
ទោះ​បី​ជា​​យ៉ាង​ណា  នៅ​សល់​រថយន្ត​ជា​ច្រើន​គ្រឿង​ទៀត​ដែល​ម្ចាស់​មិន​ហ៊ាន​​និយាយ​ទេ ព្រោះ​ខ្លាច​ខ្មាស​គេ និង​កំពុង​ស្រាវ​ជ្រាវ​រក​ទីតាំង​បញ្ចាំ​ក្នុង​គោល​បំណង​​យក​ប្រាក់​ទៅ​លោះ​ យក​រថយន្ត​​ខ្លួន​​ឯង​មក​ប្រើ​ប្រាស់​វិញ​ដែរ។ បាន​ជា​អះ​អាង​យ៉ាង​ដូច្នេះ ព្រោះ​មាន​ជន​រង​គ្រោះ​ខ្លះ​បាន​ទូរ​ស័ព្ទ​សួរ​មក​ភ្នាក់​ងារ​កោះ​សន្តិ​ភាព ​​ជា​ញឹក​ញាប់ ចង់​បាន​ព័ត៌​មាន​ដែល​នាង​ក្អយ យក​រថយន្ត​របស់​​ខ្លួន​ទៅ​បញ្ចាំ​​ថា​តើ​នៅ​ទីណា ​ដើម្បី​យក​ប្រាក់​ទៅ​លោះ​​យក​មក​វិញ ហើយ​គេ​ក៏​មិន​ចង់​ប្តឹង​​​ប្តល់​អ្វី​ដែរ។
នាង​ក្អយ មាន​បណ្តឹង​​ពី​ជន​រង​គ្រោះ​៦​នាក់ បាត់​បង់​រថយន្ត​៩​គ្រឿង ដែល​បណ្តឹង​ទាំង​នោះ​មាន​លោក​ព្រះ​រាជ​អាជ្ញា​រង​៣​រូប​កាន់​សំណុំ​រឿង​នេះ គឺ​​​លោក​​សុខ រឿន លោក​គ្រី សុខ​អ៊ី និង​​លោក​គឺ ប៊ុណ្ណារ៉ា។
មក​ដល់​ពេល​នេះ ព្រះ​រាជ​អាជ្ញា​រង​២​រូប​បាន​ចេញ​ដីកា​កោះ​ហៅ​នាង​ក្អយ ឱ្យ​ចូល​ខ្លួន​ដើម្បី​សាក​សួរ​ពី​បណ្តឹង​ជន​រង​គ្រោះ ដែល​ដីកា​កោះ​ហៅ​របស់​តំណាង​អយ្យ​ការ​នោះ​បាន​ធ្វើ​ឱ្យ​នាង​ក្អយ​ធ្លាក់​ ខ្លួន​ព្យួរ​សេរ៉ូម។ បើ​តាម​ព័ត៌​មាន​ថា នាង​ក្អយ​មាន​សុខ​ភាព​ស្លេក​ស្លាំង និង​និយាយ​ស្តី​ខុស​ពី​ធម្មតា ដែល​ខ្លះ​ចាត់​ទុក​ថា នាង​ក្អយ​ចង់​ខូច​ប្រព័ន្ធ​សរ​សៃ​ប្រសាទ បូក​​រួម​នឹង​ជំងឺ​ប្រចាំ​កាយ​​ផង។ ចាំមើល​​ តើ​នាង​ក្អយ​ចូល​ខ្លួន​តាម​ដីកា​របស់​លោក​ព្រះ​រាជ​អាជ្ញា​រង​ សុខ រឿន ដែរ​ឬ​អត់​នៅ​ថ្ងៃ​ទី​២៧ ឧសភា ​ខាង​មុខ​នេះ ឬ​ក៏​នាង​ក្អយ បន្ថែម​សេរ៉ូម​ទៀត ៕

No comments:

Post a Comment