ថ្ងៃអង្គារ ទី២៤ ខែឧសភា ឆ្នាំ២០១១ ម៉ោង១៧:៤២ (ព័ត៍មានកោះសន្តិភាព)
ខេត្តបាត់ដំបង ៖
ស្ត្រី៣នាក់បានមកដល់ស្នាក់ការសមាគមការពារសិទ្ធិមនុស្ស
«អាដហុក» ខេត្ត កាលពីព្រឹកថ្ងៃទី២៤ ឧសភា
ដើម្បីស្នើដល់សមាគមការពារសិទ្ធិមនុស្សមួយនេះជួយអន្តរាគមន៍
រំដោះកូននិងប្តីរបស់ពួកគាត់សរុបចំនួន៨នាក់
ដែលខ្លួនកំពុងរងទារុណកម្មនៅលើទូកនេសាទ
និងខ្លះទៀតកំពុងលាក់ខ្លួនក្បែរមាត់សមុទ្រនៃប្រទេសម៉ាឡេស៊ី
ដោយសារតែពួកទាហានសៀមចាប់យកទៅលក់កម្លាំងពលកម្មបន្តឱ្យពួក
នេសាទនៃប្រទេសនេះ ។
អ្នកស្រីអ៊ាង ដុន អាយុ៥៦ឆ្នាំ
រស់នៅស្រុកសំពៅលូន ជាប់ព្រំដែនប្រទេសសៀមបាននិយាយថា
ក្នុងចំណោមកម្មករខ្មែរទាំង៨នាក់នោះ
គឺមានកូនប្រុសគាត់ម្នាក់និងក្មួយប្រុសម្នាក់ផង ។
អ្នកស្រីបានប្រាប់ថា
ពួកគេធ្លាប់ចេញចូលធ្វើកម្មករលើទឹកដីសៀមជាប្រចាំ
ដោយមិនស្របច្បាប់ទេ
ប៉ុន្តែនៅចុងក្រោយនេះពួកគេចេញទៅតាំងពីដើមខែមករា
ឆ្នាំ២០១១ តែគ្មានឮដំណឹងសោះ លុះនៅថ្ងៃទី២០ ឧសភា
ស្រាប់តែកូនប្រុសគាត់ឈ្មោះទិត្យ ភ័ក្ត្រ អាយុ៣០ឆ្នាំ
បានទូរស័ព្ទមកប្រាប់គាត់ថា
ពួកគេត្រូវទាហានសៀមចាប់យកទៅលក់ឱ្យធ្វើកម្មករចុះទូក
នេសាទនៅប្រទេសម៉ាឡេស៊ី ។
កូនប្រុសរបស់គាត់បានបញ្ជាក់ប្រាប់ថា
រូបគេនិងគ្នីគ្នាចំនួន៥នាក់ទៀតបានលោតចុះទឹកហែលឆ្លង
សមុទ្រលាក់ខ្លួនក្បែរសមុទ្រមួយកន្លែងនៅប្រទេសម៉ាឡេស៊ី
រីឯ២នាក់ទៀតកំពុងស្ថិតនៅលើទូកនេសាទនោះហើយកំពុងរង
ទារុណកម្មដែរ ។
ពេលឮដូច្នេះទើបគាត់មករកអង្គការអាដហុកឱ្យជួយអន្តរាគមន៍ ។
នៅវេលាម៉ោង១២ថ្ងៃត្រង់ថ្ងៃទី២៤ ឧសភា
កូនប្រុសអ្នកស្រីអ៊ាង ដុន ឈ្មោះទិត្យ ភ័ក្ត្រ អាយុ៣០ឆ្នាំ
ដែលកំពុងសំងំលាក់ខ្លួននៅក្នុងផ្ទះពលរដ្ឋម៉ាឡេស៊ីមួយកន្លែង
នៅមាត់សមុទ្របានប្រាប់កោះសន្តិភាពតាមទូរស័ព្ទថា
រូបគេនិងគ្នីគ្នា៥នាក់ទៀតដែលមានឈ្មោះឯម សុង ឈ្មោះសូ រ៉ា
ឈ្មោះប៊ី ស៊ីន ឈ្មោះមាស សារុន និងឈ្មោះទា សុខ
កំពុងសំងំលាក់ខ្លួនក្នុងផ្ទះពលរដ្ឋម៉ាឡេស៊ីមួយកន្លែងក្បែរ
មាត់សមុទ្រក្នុងខេត្តសារ៉ាវ៉ាត់នៃប្រទេសសាម៉ាឡេស៊ី ។ ទិត្យ
ភ័ក្ត្រ បានប្រាប់ទៀតថា រីឯពួកខ្លួន២នាក់ទៀតគឺឈ្មោះឆន
ក្រិម និងឈ្មោះពឹង
កំពុងរងទារុណម្មនៅលើទូកនេសាទរបស់ជនជាតិម៉ាឡេស៊ី
ព្រោះពួកគេតូចៗមិនអាចហែលទឹកឆ្លងសមុទ្របាន។
កម្មករខ្មែររូបនេះបានរៀបរាប់ថា
ពួកខ្លួនបានចូលទៅធ្វើកម្មករដោយមិនស្របច្បាប់លើទឹកដី
សៀមដែលពួកខ្លួនធ្លាប់ចេញចូលជាប្រចាំ ប៉ុន្តែនៅថ្ងៃទី១៤
មេសា កន្លងទៅ
ក៏ត្រូវពួកទាហានសៀមព័ទ្ធចាប់បញ្ជូនតាមរថយន្តមកកាន់សមុទ្រ
ម៉ាឡេស៊ីដើម្បីលក់ឱ្យធ្វើពលកម្មលើទូកជនជាតិម៉ាឡេស៊ី ។
បុរសនេះនិយាយទៀតថា
ពួកខ្លួនត្រូវធ្វើដំណើរតាមទូកចំនួន១០យប់ទើបដល់ខេត្ត
សារ៉ាវ៉ាត់ ប្រទេសម៉ាឡេស៊ី
ហើយខណៈនោះពួកខ្លួន៦នាក់បានលោតចុះពីទូកពេលយប់ដោយកាន់
ប៊ីដុងម្នាក់១ ហែលឆ្លងសមុទ្រ ប្រហែល២០០ម៉ែត្រទើបដល់ច្រាំង
ហើយលាក់ខ្លួនមួយរយៈ ។ ឈ្មោះទិត្យ ភ័ក្ត្រ បានបញ្ជាក់ថា
ពេលខ្លួនលោតចុះទឹកហែលបានបន្តិចគេឮសំឡេងស្រែកឱ្យជួយដែល
ទំនងម្ចាស់ទូកវាយធ្វើបាបឈ្មោះក្រឹម និងឈ្មោះពឹង
ដែលនៅលើទូកនោះ។
រីឯអ្នកស្រីផាន់ សុវ៉ាង អាយុ៤៥ឆ្នាំ
រស់នៅស្រុកសំពៅលូន ដែរបាននិយាយថា
ប្តីរបស់គាត់ក៏កំពុងលាក់ខ្លួននៅជាមួយគេដែរក្រោយពីហែលទឹក
រួចពីទូកនេសាទ ។ ដោយឡែកអ្នកស្រីឆាយ ឈូន រស់នៅស្រុកកំរៀង
ក៏បានប្រាប់ដែរថា
កូនប្រុសគាត់ម្នាក់និងក្មួយម្នាក់ក៏រត់រួចពីទូកនេសាទនោះហើយ
ដែរ ។ ពួកគាត់និយាយថា
ពួកគាត់មកកាន់ស្នាក់ការអាដហុកនេះក្នុងបំណងសុំឱ្យជួយ
អន្តរាគមន៍យ៉ាងណារំដោះកូន ក្មួយ
និងប្តីរបស់គាត់ពីប្រទេសម៉ាឡេស៊ីផង
ពិតមែនតែពួកគេឆ្លងដែនខុសច្បាប់ក្តី ។
លោកយិន ម៉េងលី
មន្ត្រីស៊ើបអង្កេតអង្គការអាដហុកប្រចាំខេត្តបាត់ដំបង
និងប៉ៃលិន បានថ្លែងថា
យើងបានទទួលបណ្តឹងរបស់អាណាព្យាបាលពលករខ្មែរទាំងនោះហើយ
ហើយយើងនឹងបញ្ជូនសំណុំរឿងនេះទៅកាន់ស្នងការដ្ឋានខេត្ត
ដើម្បីចាត់ការបន្ត ។ លោកនិយាយថា
បើករណីដែលស្នងការដ្ឋានជួបការលំបាកយើងនឹងរាយការណ៍ជូនទៅសមាគម
អាដហុកនៅភ្នំពេញដើម្បីសហការជាមួយក្រសួងមហាផ្ទៃចាត់ការ
រឿងនេះឱ្យបានលឿន
ព្រោះពលករទាំង៨នាក់នេះកំពុងជួបគ្រោះអាសន្នយ៉ាងធ្ងន់ធ្ងរ
ដូច្នេះយើងត្រូវតែពន្លឿនចំណាត់ការនេះ ៕
No comments:
Post a Comment